Ձեր վստահելի աղբյուրը

«Կիսանախագահական համակարգն ունի իր թերությունները, սակայն թերություններից զերծ չէ նաև այն կառավարման ձևը, որին մենք անցում ենք կատարելու»,-այսօր լրագրողների հետ հադիպմանն ասաց ԱԺ ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը:

Նա գործող համակարգի ամենամեծ թերությունն այն է համարում, որ կա երկու առաջնային մանդատ ունեցող սուբյեկտ, մեկը՝ ՀՀ նախագահը, երկրորդը՝ խորհրդարանը, և այս իրավիճակում, եթե նրանք նույն քաղաքական ուժը չեն ներկայացնում, կոնֆլիկտն անխուսափելի է դառնում. «Մենք շրջանցել ենք սա միշտ, քանի որ երկրի նախագահն ու խորհրդարանական մեծամասնությունը նույն ուժից են եղել, բայց հնարավոր է այլ իրավիճակ և վաղ թե ուշ կոնֆլիկտներն անխուսափելի կդառնան»:

Պատգամավորը նաև նշեց, որ թերություններից զերծ չի մնում նաև առաջարկվող խորհրդարանական համակարգը:

Ըստ նրա, հիմնական թերությունն անկայունությունն է. «Եթե 50+1 տոկոս ձայնով ընտրում եք կառավարություն, ապա մեկ պատգամավորի հեռացումը բերելու է նրան, որ կառավարությունը պետք է հրաժարական տա: Խնդրին հանդիպել են խորհրդարանական համակարգի երկրները, իսկ ամենաշատը տառապել է Իտալիան, որտեղ էլ գտնվել է այդ խնդրի լուծման մի ճանապարհ՝ կայուն մեծամասնության ստեղծումը:

Նախորդող հրապարակում՝
Որոշումը կայացնելու է հասարակությունը. Գ. Մինասյանը` ՍԴ բարեփոխումների մասին (Տեսանյութ)