Ձեր վստահելի աղբյուրը

Ցավոք սրտի, Կառավարությունը որոշումներ է կայացնում, որոնք հանրության համար ընդունելի չեն: Այսօր լրագրողների հետ զրույցում ասաց հրապարակախոս Կարինե Հակոբյանը՝ անդրադառնալով «Կարեն Դեմիրճյանի անվան մարզահամերգային համալիր» պետական ոչ առևտրային կազմակերպության վաճառքին:

Նրա խոսքերով՝ համալիրը ավագ սերնդի համար նվիրական կառույց է, ուստի զգացմունքային են վերաբերվում ամեն մի որոշմանը. «Հասկանալի է, որ այն պահպանելը և եկամուտ ապահովելը դժվար է, բայց դրա համար լուծումներ են պետք, որը պետք է կառավարությունն առաջարկի: Մինչդեռ դա մենք չենք տեսնում»:

Հրապարակախոսը գտնում է, որ Մարզահամերգային համալիրը պետք է ազգայնացնել և տրամադրել ՀՀ մշակույթի նախարարությանը, քանի որ այն մշակութային կենտրոն է. «Եթե պրոֆեսիոնալ կառավարում իրականացվի, ապա շահագործումը եկամտաբեր կլինի: Այն մեր պետության խորհրդանիշներից մեկն է, բայց եթե մասնավորեցնենք և միայն մտածենք շահույթի մասին, ապա, բնականաբար կզրկվենք դրանից»:

Ինչ վերաբերում է համալիրում խաղատան կառուցմանը, ապա հրապարակախոսը գտնում է, որ չի կարելի Ծիծեռնակաբերդի հուշարձանի տարածքում խաղատուն շահագործել. «Խաղատունը չի կարելի ներդրում համարել, եթե մի բան քայքայում է հասարակությանը և դարձնում անառողջ, դա չի կարող ներդրում համարել»:

Կ.Հակոբյանը նաև նկատեց, որ ի սկզբանե համալիրը սխալ տարածքում է կառուցվել, քանի որ մոտ է Ծիծեռնակերդի հուշահամալիրին, բայց հիմա այնտեղ որևէ լրացուցիչ կառույց չպետք է լինի. «Մի ժողովուրդ, որը ձեռք է տալիս իր սրբությանը, նա դադարում է ազգ լինելուց»:

Ասուլիսի մեկ այլ բանախոս, քանդակագործ, Մարզահամերգային հուշահամալիրի ճակատային քանդակի հեղինակ Ֆերդինանդ Առաքելյանն ասաց, որ Կարեն Դեմիճյանը ցանկություն է ունեցել երկու մեծ դահլիճ կառուցել, բացի այդ, շեշտը դրվել է նրա վրա, որ այդ համերգասրահները կենտրոնում լինեին. «Սկզբնական շրջանում նախագիծ կար, որ Կասկադի մեջ լիներ, բայց ճարտարապետ Ջիմ Թորոսյանը թույլ չտվեց և ընտրվեց այս բլուրը, թեև այն ժամանակվա ղեկավարները դեմ էին, քանի որ գիտակցում էին, որ այդ տարածքում է գտնվում Ծիծեռնակաբերդի հուշահամալիրը»:

Հարցին, թե արդյոք այլ լուծում առաջարկվել է, քանդակագործն ասաց, որևէ մեկն իրեն ոչինչ չի առաջարկել:

«Արդյո՞ք վարչապետին չի մտահոգում Կառավարության անդամների պասիվությունը, մի՞թե Կառավարությունում մի համարձակ նախարար չկար, ով կընդդիմանար Կ. Դեմիրճյանի անվան մարզահամերգային համալիրի վաճառքի խայտառակ գործընթացին: Միթե՞ վարչապետին այս կառավարությունը չի մտահոգում, բայց ինձ իսկապես մտահոգում է»,- նշեց Ֆ.Առաքելյանը և հավելեց. «Ավելի լավ է համալիրը քանդեն, քան բարդակ սարքեն»:

Նրա խոսքերով՝ խորհրդանիշ հանդիսացող կոթողները պետությունը պետք է պահպանի, այլ ոչ թե քանդի. «Միթե՞ Լուվրը, Լա Սկալան էդպես են պահում: Պետությունը գումար է ներդնում և պահպանում այն, ինչը մշակութային արժեք է»:

Նա նաև նշեց, որ համալիրի նախկին սեփականատերերը բավականին գումարներ են ներդրել համալիրի վերականգնման համար, սակայն չգիտես ինչու նրանց ձեռքից վերցրեցին. «Հիմա ենք հասկանում, թե ինչու վերցրեցին»:

Ֆ.Առաքելյանը մտավորականներին կոչ արեց ուշքի գալ և թույլ չտալ քանդել խորհրդանիշ հանդիսացող կառույցները. «Իհարկե խոսքը չի վերաբերվում քծնող մտավորականներին»:

Ամփոփելով խոսքը Ֆ.Առաքելյանն ասաց, որ բլուրին այլևս մոտենալ չի կարելի, քանի որ այն ավարտուն է, այն քարերով ռեքվիեմ է և աշխարհում նման այլ կառույց գոյություն չունի. «Ամեն տեղ կարող եք բիզնես ծավալել, բայց ոչ Եղեռնի զոհերի հուշարձանի մոտ: Միթե՞ այդ հուշարձանի մոտ կարելի է տաշի-տուշի անել, կազինո հիմնել: Ուզում ենք հաղթել տգիտությանը և քաղաքակրթություն նվաճել այս ձևո՞վ»:

Նա միաժամանակ ասաց, որ Մարզահամերգային համալիրի շենքի կառուցվածքը ոչ մի կերպ թույլ չի տալիս, որ դրա ներսում ջրաշխարհ ու խաղատուն կառուցվի, թեև, ըստ նրա, «օլիգարխների ախորժակն այնքան մեծ է, որ նրանք կարող են նաև այդ կառույցը փոխել»:

Բանախոսները կոչ արեցին, որ մարդիկ պայքարեն, քանի որ միայն պայքարի արդյունքում է հնարավոր այդ որոշումը չեղյալ համարել. «Ի վերջո մենք սրբավայրի հետ գործ ունենք»: