Ձեր վստահելի աղբյուրը

Այսօր Մալաթիա-Սեբաստիա վարչական շրջանում կատարված սպանության փաստի առթիվ հարուցված քրեական գործի շրջանակում մոտ մեկ տասնյակ վկա է հարցաքննվել: Այս մասին Panorama.am-ին հայտնեց Քննչական կոմիտեի մամուլի խոսնակ Սոնա Տռուզյանը:

Նրա խոսքով, այս պահին ձերբակալվածներ չկան:

«Փաստինֆո»-ի  տեղեկություններով, քիչ առաջ Դալմայի այգիների մոտից բերման է ենթարկվել Մալաթիա-Սեբաստիա վարչական շրջանի տարածքում սպանված 25-ամյա տղամարդու եղբայրը:

Ըստ նախնական տվյալների, սպանությունը տեղի է ունեցել երեկ, որից հետո սպանվածի եղբայրը՝ 37-ամյա Կ. Կարապետյանը հեռացել է տնից:

Ավելի վաղ Քննչական կոմիտեն տեղեկացրել էր, որ ՀՀ քննչական կոմիտեի Երևանի քննչական վարչության Մալաթիա-Սեբաստիա վարչական շրջանի քննչական բաժնում հարուցվել է քրեական գործ՝ 25-ամյա երիտասարդի սպանության դեպքի առթիվ։

2015թ. օգոստոսի 18-ին` ժամը 07:30-ին, ահազանգ է ստացվել Երեւանի բնակչուհի Ս.Սարուխանյանից, որ տղան սպանվել է:

Անմիջապես դեպքի վայր է մեկնել քննչական-օպերատիվ խումբը։ Դեպքի վայրի զննությամբ՝ հյուրասենյակի բազմոցի վրա հայտնաբերվել է նույն տան բնակիչ, 1990թ. ծնված Վ. Կարապետյանի դին` գլխի շրջանում վնասվածքներով:

Դեպքի առթիվ 2015թ. օգոստոսի 18-ին Մալաթիա-Սեբաստիա վարչական շրջանի քննչական բաժնում հարուցվել է քրեական գործ՝ ՀՀ քրեական օրենսգրքի 104-րդ հոդվածի 1-ին մասով (սպանություն):

Նախաքննության ընթացքում պարզվել է, որ դիակը հայտնաբերել է մայրը։ Սպանված երիտասարդը նշված տանը բնակվել է եղբոր հետ, իսկ մայրը՝ երրորդ որդու տանը։ 2015թ. օգոստոսի 18-ին առավոտյան մայրն այցելել է որդիներին եւ տան հյուրասենյակում՝ բազմոցի վրա պառկած, հայտնաբերել Վ.Կարապետյանին՝ սպանված։

Նշանակվել են դիակի դատաբժշկական փորձաքննություն, իսկ դեպքի վայրի զննությամբ հայտնաբերված արյան հետքերով` դատակենսաբանական փորձաքննություն:

Մշակվել են աշխատանքային վարկածներ, որոնք ստուգելու ուղղությամբ կատարվում են անհրաժեշտ քննչական գործողություններ, հանձնարարություն է տրվել ոստիկանության Մալաթիայի բաժնին՝ միջոցներ ձեռնարկել հանցագործություն կատարած անձին և հանցագործության գործիքը հայտնաբերելու ուղղությամբ: 

Նախաքննության արդյունքների մասին տեղեկություն կտրամադրվի լրացուցիչ։

Նախորդող լուր՝
Երևանում մայրը որդուն սպանված է հայտնաբերել