«Պաշտոնապես պնդում եմ, որ Մարզահամերգային համալիրում կազինո չի լինելու». ՀՀԿ խոսնակ
«Մարզահամերգային համալիրի ճարտարապետական տեսքը խաթարող որևէ գործընթաց չի իրականացվելու: Ինչպես նաև պնդում եմ, որ համալիրում կազինո լինել չի կարող և չի լինելու»,- նախօրեին ՀՀԿ գործադիր մարմնի նիստից հետո լրագրողների հետ հանդիպման ժամանակ ասել է ՀՀԿ խոսնակ, ԱԺ փոխնախագահ Էդուարդ Շարմազանովը:
Պատասխանելով հարցին, որ ծրագրում հստակ նշված է, որ կառուցվելու է խաղատուն, նա նշել է. «Պաշտոնապես, որպես Էդուարդ Շարմազանով, պնդում եմ, որ Մարզահամերգային համալիրում կազինո լինել չի կարող, Մարզահամերգային համալիրում կազինո չի լինելու»:
Հիշեցնենք, որ ՀՀ կառավարության որոշմամբ «Կարեն Դեմիրճյանի անվան մարզահամերգային համալիր» պետական ոչ առևտրային կազմակերպությունը վաճառքի ձևով օտարվել է ՆՏԱԱ ԻՆՎԵՍՏՄԵՆՏ ԳՐՈՒՊ ՍՊԸ–ին: Ըստ ծրագրի, նախատեսվում է վերանորոգել համալիրի շենքը, իրականացնել կառուցապատում և ստեղծել ընտանեկան ուղղվածության համալիր կենտրոն, որը ներառելու է հյուրանոցներ, փակ ջրաշխարհ, համերգային դահլիճներ, հանդիպումների սրահներ, ռեստորաններ, խանութներ և խաղատուն:
ՀՀԿ խոսնակի կարծիքով, համալիրի վաճառքի գործընթացը բավականին լուրջ, խոստումնալից, դրական գործարք է. «Մարզահամերգային համալիրը յուրաքանչյուրիս համար թանկ է, կարևորագույն կառույց է: Դրանով եմ պայմանավորում մեր քաղաքացիների, փորձագետների որոշ մտահոգությունները: Միաժամանակ գտնում եմ, որ այս հարցի շուրջ կա ինֆորմացիայի պակաս, ինչն էլ հանգեցնում է որոշակի շահարկումների»:
Է. Շարմազանովի խոսքով, 100 միլիոն դոլարի ներդրումները նոր կյանք կհաղորդեն համալիրին, զարգացման հնարավորություն կընձեռեն կառույցին:
Տեղեկանք.
Համալիրի սպորտային մասի բացումը տեղի է ունեցել 1983 թվականին, համերգային մասի բացումը՝ 1984 թվականին: 2005-ի սեպտեմբերին պետության սեփականություն մարզահամերգային համալիրը կառավարության որոշմամբ 5 միլիոն 700 հազար դոլարով վաճառվել էր Ռուսաստանում հայտնի գործարար Մուրադյան եղբայրներին, որոնց պատկանում է «ԲԱՄՕ» ընկերությունների խումբը: Պաշտոնապես վերաբացվել էր այն 2008թ-ին, կառույցի համար ներդրվել էր 42 մլն դոլար: 2014 թվականի մայիսի 19-ին Կարեն Դեմիրճյանի անվան մարզահամերգային համալիրը հանվել էր աճուրդի (http://www.panorama.am/am/society/2014/08/30/d-harutyunyan/): Մեկնարկային գինն էր 19 350 000 000.0 դրամ: Վերջին աճուրդի ժամանակ արդեն գինը սահմանել էր 10 միլիարդ 283 միլիոն 383 հազար 350 դրամ: Գնորդ այդպես էլ չի հայտնվել: 2014 թ. օգոստոսի 21-ի կառավարության որոշմամբ Երևանի Կարեն Դեմիրճյանի անվան մարզահամերգային համալիրը պարտքի դիմաց հանձնվել էր պաշտպանության նախարարության հաշվեկշռին: Մարզահամերգային համալիրի պարտքը պետությանը կազմում է շուրջ 10 միլիարդ 400 միլիոն դրամ: Ներկայումս ՄՀՀ ՓԲԸ-ի հետ կապված Կենտրոն և Նորք Մարաշ ընդհանուր իրավասության դատարանում մեկ տարուց ավել քննվում է կառավարության և ԴԱՀԿ միջև կնքված գույքը հանձնելու վերաբերյալ պայմանագրի վիճարկումը: Ընկերության սնանկության գործընթացը ևս ավարտված չէ, սակայն 2015 թ. օգտոստոսի 13-ի ՀՀ կառավարության որոշմամբ Մարզահամերգային համալիրը 30 միլիոն դոլարով վաճառվել է «ՆՏԱԱ ԻՆՎԵՍՏՄԵՆՏ ԳՐՈՒՊ» սահմանափակ պատասխանատվությամբ ընկերությանը:
Նախորդող հրապարակումներ՝
Տնտեսագետ. Համալիրի դեպքում մենք գործ ունենք ոչ պատասխանատու սեփականատիրոջ հետ
Ռիմա Դեմիրճյան. Խաղատուն կառուցելու դեպքում համալիրը կվերածվի հայկական Լաս Վեգասի
Եթե նախագիծ ներկայացնեն, գուցե ավելի հանգիստ լինենք. Մկրտիչ Մինասյանը` Համալիրի մասին
Անահիտ Բախշյան. Համալիրի վաճառքի գործարքի տակ շատ մեծ շահ կա
Համալիրը վաճառելուց առաջ որևէ մեկը Ցեղասպանության ինստիտուտ-թանգարանի տնօրենի կարծիքը չի հարցրել
Մարզահամերգային համալիրը վաճառվեց
Մարզահամերգային համալիրի վաճառքի շուրջ հարցերն ու մտահոգություններն ավելանում են
Նորից կվերածեն ինչ-որ անճոռնի մի կառույցի. Կորյուն Գրիգորյանը ՄՀՀ-ի մասին
Լրահոս
Տեսանյութեր
Վ.Հակոբյան. Ռուսաստանի հետախուզությունն ասում է՝ գիտենք, ինչ փողեր են գալիս, ում գրպաններն են մտնում
