Ձեր վստահելի աղբյուրը

ԼՂՀ ՊԲ պաշտոնական հաղորդագրության համաձայն,  օգոստոսի 28-ին ժամը 01.40-ի սահմաններում ղարաբաղա-ադրբեջանական հակամարտ զորքերի շփման գծի արևելյան ուղղությամբ հակառակորդը ձեռնարկել է հետախուզադիվերսիոն ներթափանցման հերթական փորձ: Ծավալված մարտերի ընթացքում հայկական կողմը կորուստներ չի ունեցել: Բացի հետախուզադիվերսիոն գործողությունից, հակառակորդը` օգոստոսի 27-ի լույս 28-ի գիշերը տարբեր տրամաչափի հրաձգային և հրետանային զինատեսակներից հրադադարի պահպանման ռեժիմը խախտել է շուրջ 110 անգամ, որի ընթացքում արձակել է 2000-ից ավելի կրակոց, այդ թվում` 35 կրակոց` 60, 82 և 120 մմ-ոց ականանետերից:

Panorama.am-ի հետ զրույցում, մեկնաբանելով ստեղծված իրավիճակը, քաղաքագետ Տիգրան Աբրահամյանը նշեց, որ վերջին շրջանում Ադրբեջանը կտրուկ ակտիվացրել է դիվերսիոն խմբերի գործողությունները, ինչն առաջնագծում առավել լարվածություն է ստեղծել:

«Ղարաբաղա-ադրբեջանական զորքերի շփման գծի տարբեր ուղղություններով Ադրբեջանը կտրուկ ակտիվացել է: Առաջնագծում հատկապես նկատելի է դիվերսիոն և դիպուկահար խմբերի, ինչես նաև՝ ականանետային ու նռնականետային ստորաբաժանումների ակտիվությունը»,-ասաց Տ. Աբրահամյանը:

Որպես լարվածության աճին նպաստող գործոն փորձագետը հատուկ ընդգծեց, օրեր առաջ, Ադրբեջանի կողմից կիրառված, թուրքական արտադրության TR-107 տիպի համազարկային կրակի ռեակտիվ համակարգը, որը «պրոցեսները կարող է էսկալացիայի մղել»:

«Իրավիճակն այս պահին դուրս չի գալիս վերահսկողությունից միայն այն պատճառով, որ հայկական ուժերն առաջնագծում համապատասխան օպերացիաներ են իրականացնում, ինչը զսպում է Ադրբեջանը կտրուկ ակտիավացումը»,-կարծիք հայտնեց նա:

Նախորդող լուր՝
Հակառակորդը կիրառել է թուրքական արտադրության TP-107 տիպի ռեակտիվ հրթիռահրետանային կայանք