Ձեր վստահելի աղբյուրը

Ամերիկյան առաջատար «Foreighn Policy» պարբերականի փոխանցմամբ` այդ երկրի ակադեմիական շրջանակները և քաղաքացիական հասարակության ներկայացուցիչները մեղադրանքներ են ուղղել Կոնգրեսի էթիկայի հանձնաժողովին` Բաքու կատարած կոնգրեսականների այցերի հետ կապված:

Ինչպես նշվում է` Կոնգրեսի էթիկայի հանձնաժողովից պահանջում են հրապարակել անկախ հետաքննության արդյունքներն այն մասին, թե արդյո՞ք Ադրբեջանը վճարել է մի շարք օրենսդիրների Բաքու կատարած այցի համար և այդ ամենը որքանո՞վ է հակասում Կոնգրեսի ներքին կանոնադրությանը և ԱՄՆ օրենքներին:

Պարբերականը հիշեցնում է, այն բանից հետո, երբ այս տարի «The Washington Post»-ի կողմից հրապարակումներ եղան այն մասին, որ ԱՄՆ մոտ 10 կոնգրեսականներ և Կոնգրեսի 32 աշխատակիցներ Ադրբեջանի հովանավորությամբ այդ երկիր են գնացել, մասնակցել համաժողովների, ինչպես նաև ստացել մոտ 2.500-ից մինչև 10.000 դոլար արժողությամբ նվերներ, Կոնգրեսի անկախ մարմին էթիկայի գրասենյակը հետաքննություն սկսեց: Աղբյուրի փոխանցմամբ, արդեն մայիս ամսին այդ հետաքննության արդյունքները ներկայացվել են Էթիկայի հանձնաժողովին, վերջինս էլ որոշել է, որ կոնգրեսականներն այցեր իրականացնելով և նվերներ ստանալով որևէ օրենքի խախտում թույլ չեն տվել:

Շարունակելով, պարբերականը գրում է, որ հանձնաժողով ներկայացված զեկույցը գաղտնի է մնացել և որևէ կերպ չի հրապարակվել, ինչը բազմաթիվ հարցեր է առաջացնում կապված այն բանի հետ, որ օտարերկրյա կառավարությունները ազդեցություն են գործում ԱՄՆ քաղաքականության վրա:

Նկատենք, որ ամերիկյան առաջատար պարբերականների կողմից Միացյալ Նահանգներում Ադրբեջանի լոբբիստական գործունեության, կոնգրեսականներին և այլ գործիչներին գաղտնի ֆինանսավորելու մասին լուրերը վերջին շրջանում մեծ ուշադրության են արժանանում: Մասնավորապես` նույն «Foreighn Policy» պարբերականի կողմից այս տարվա հունիս ամսին հրապարակված այս թեմայի հետ կապված անդրադարձում ներկայացվում է Ադրբեջանի լոբբիստական գործունեությունը առ այն, թե ինչպես է «Ալիևի ռեժիմը Վաշինգթոնում իրեն վաճառում որպես ԱՄՆ-ին բարեկամորեն տրամադրված և պրոգրեսիվ ռեժիմ»:

Վերոնշյալ հրապարակումից պարզ է դառնում, որ Ադրբեջանի կառավարությունը և վերջինիս հետ ասոցացվող կառույցները 2014 թվականի վերջի տվյալներով մոտ 4 մլն դոլար են ծախսել «վերլուծական հանրության և օրենսդիրների շրջանում ագրեսիվ լոբբինգ անելու համար»:

Նշվում է, որ Ադրբեջանի օգտին Վաշինգթոնում լոբբինգ անող հիմնական կառույցը «Podesta group» լոբբիստական կազմակերպությունն է, որի ծառայությունների համար ամսեկան վճարը ԱՄՆ-ում Ադրբեջանի դեսպանությունը այս տարվա փետրվարից սկսած 50.000 դոլարից դարձրել է 75.000 դոլար:

Ադրբեջանի կողմից լոբբիստական աշխատանքները համակարգելու գործում գլխավոր դերակատարումը վերապահված է «Ադրբեջան-Ամերիկա ալիանս» կազմակերպությանը, որի ղեկավարը, աղբյուրի փոխանցմամբ, «Անար Մամադովն է` Ադրբեջանի տրանսպորտի կոռումպացված նախարարի որդին»: 

Ինչպես նշում է պարբերականը, այս կառույցները իրենց գործն անում են բազմաթիվ կոնգրեսականների և վերլուծաբան փորձագետների միջով, ովքեր տարբեր կապերով կապված են նախ ամերիկյան լոբբիստական կառույցների և ապա Ադրբեջանի իշխանամետ կառույցների հետ:

«Foreign Policy»-ն նկատում է, որ Ադրբեջանը ԱՄՆ-ում իրեն լոբբինգ անող արտասահմանյան թոփ 10 կառավարությունների մեջ է մտնում, բայց եթե մյուսների դեպքում ինչ-որ կերպ հասկանալի է, թե նրանք ի վերջո ինչի են հասնում Կոնգրեսի սրահներում և կուլիսներում, ապա Ադրբեջանի դեպքում պատկերն այլ է: Ըստ պարբերականի` ամեն ինչ պարզ է դառնում, երբ այս կամ այն կոնգրեսականը ջերմեռանդ գովերգում է Ադրբեջանին` որպես «զարգացող», «բարեկամորեն տրամադրված» կամ «ժողովրդավարություն», բայց հաջորդ իսկ պահին այդ երկրից ստացվում է մարդու իրավունքների կոպտագույն խախտումների մասին փաստարկված տեղեկություններ:

Պարբերականը նաև տարօրինակ է համարում, որ ԱՄՆ կոնգրեսականները գովերգում են Ադրբեջանին ինչ-որ գումարների դիմաց, մինչդեռ ադրբեջանցի պաշտոնյաները ԱՄՆ-ին մեղադրում են իրենց ներքին գործերին միջամտելու, երկրում ռեժիմի փոփոխություն նախապատրաստելու և այլ մութ քայլերի համար` ցուցաբերելով բացահայտ հակաամերիկյան հռետորաբանություն: