Ձեր վստահելի աղբյուրը

Խնայբանկում մինչև 1993 թվականի հունիսի 10-ը ներդրված դրամական ավանդների դիմաց այս պահին փոխհատուցվածների թիվը կազմում է 15 623: Աշխատանքի և սոցիալական հարցերի նախարարության սոցիալական աջակցության վարչության պետ Աստղիկ Մինասյանը Panorama.am-ի հարցերին ի պատասխան, մանրամասնեց.

««Հայաստանի Հանրապետության 2015 թվականի պետական բյուջեի մասին» ՀՀ օրենքի 9-րդ հոդվածի 11-րդ մասի համաձայն՝ 2015 թվականին շարունակվում է «ՎՏԲ-Հայաստան բանկ» ՓԲԸ-ում ավանդատու հանդիսացող քաղաքացիների, որպես նախկին ԽՍՀՄ Խնայբանկի ՀԽՍՀ հանրապետական բանկում մինչև 1993 թվականի հունիսի 10-ը ներդրված դրամական ավանդների դիմաց փոխհատուցման ծրագիրը:

Նույն հոդվածի 12-րդ մասի բ) ենթակետով սահմանված է, որ նախկին ԽՍՀՄ Խնայբանկի ՀԽՍՀ հանրապետական բանկում մինչև 1993 թվականի հունիսի 10-ը ներդրված դրամական ավանդների դիմաց փոխհատուցումը տրամադրվում է ընտանիքների անապահովության գնահատման համակարգում հաշվառված «0»-ից բարձր անապահովության միավոր ունեցող ընտանիքների` մինչև 1931թվականի դեկտեմբերի 31-ը ներառյալ ծնված անդամներին և Հայաստանի Հանրապետության պաշտպանության մարտական գործողությունների մասնակից և մարտական գործողությունների հետևանքով չօգտագործվող և հակառակորդի կողմից հողատարածքների գնդակոծման դեպքեր ունեցող` ՀՀ սահմանամերձ համայնքներում 2014 թվականի օգոստոսի 1-ի դրությամբ հաշվառված անձանց, ՀՀ կառավարության 23.04.2014թ. N 460-Ն որոշմամբ սահմանած կարգով»:

Ա. Մինասյանի՝ Panorama.am-ին տրամադրած տվյալների համաձայն, այս տարվա օգոստոս ամսվա տվյալներով դրամական ավանդների դիմաց փոխհատուցում ստացել են`

ընտանիքների անապահովության գնահատման համակարգում հաշվառված «0»-ից բարձր անապահովության միավոր ունեցող ընտանիքների` մինչև 1931 թվականի դեկտեմբերի 31-ը ներառյալ ծնված անդամ» սոցիալական խմբի ներկայացուցիչներից 8114 հերթական համարն ունեցող ավանդատուն,
«ՀՀ սահմանամերձ համայնքի բնակիչ» սոցիալական խմբի ներկայացուցիչներից 4257 հերթական համարն ունեցող ավանդատուն,
«Հայաստանի Հանրապետության պաշտպանության մարտական գործողությունների մասնակից» սոցիալական խմբի ներկայացուցիչներից 3252 հերթական համարն ունեցող ավանդատուն:

Միաժամանակ նախարարությունից հայտնեցին, որ ՀՀ Ազգային Ժողովի կողմից 22.05.2014թ.-ին հավանության է արժանացել ՀՀ կառավարության 19.05.2014թ.-ի «Հայաստանի Հանրապետության կառավարության ծրագրի մասին» N 511-Ա որոշումը, որով նախատեսված է իրականացնել՝ նախկին ԽՍՀՄ Խնայբանկի ՀԽՍՀ հանրապետական բանկում մինչև 1993 թվականի հունիսի 10-ը ներդրված դրամական ավանդների դիմաց սոցիալապես խոցելի ավանդատուներին օգնության տրամադրման շարունակական ծրագրեր: