Ձեր վստահելի աղբյուրը

Նախատեսվում է վերանայել ոչ միայն հանրակրթական դպրոցների դասագրքերը, այլև 1-12-րդ դասարանների ուսումնական ծրագրերը: Այս մասին այսօր թիվ 2 ավագ դպրոցում հայտարարեց ՀՀ կրթության և գիտության նախարար Արմեն Աշոտյանը, երբ 12-րդ դասարանի աշակերտը նախարարին ասաց, որ դասագրքերը բարդ են և ծանրաբեռնված, և արդյոք չեն պատրաստվում վերանայել դպրոցական դասագրքերը:

Նախարարը խոստովանեց, որ Հայաստանի հանրակրթական դպրոցների ուսումնական ծրագիրը Եվրոպայի ամենածանր, դժվար ծրագրերից մեկն է, քանի որ, ըստ Ա.Աշոտյանի, հայ պրոֆեսորները, ակադեմիկոսներ մտածել են, որ երկու ժամում պետք է ամեն ինչ գրեն. «Ուստի մեր դասագրքերը գերծանրաբեռնված են, քանի որ փորձել են ամեն ինչ այնտեղ ընդգրկել»:

«Ավագ դպրոցի շատ դասագրքերը չեն տարբերվում բուհերի առաջին կուրսերի կոնսպեկտներից: Բերանս եք բացել տալիս, բայց մեր գիտնականների մեծ մասը չեն կարողանում դասագիրք գրել: Նրանք շատ լավ գիտնականներ են, կարող են շատ լավ մենագրություններ, հրաշալի հոդվածներ գրել, գյուտեր հորինել, բայց դասագիրք հեղինակելն ուրիշ բան է: Կարող ես լինել Նոբելյան մրցանակակիր, բայց դասագիրք գրել չկարողանաս: Եւ հակառակը՝ կարող ես լինել միջին գիտնական, բայց մանկավարժ՝ հոգեբանությամբ ու մտածելակերպով, և ճիշտ մատուցել իմացածը»,- ասաց Արմեն Աշոտյանը:

Նախարարը միաժամանակ ավելացրեց, որ ինքը չի փնովում հեղինակներին, շնորհակալ է, որ Հայաստանի դպրոցների դասագրքերի հիմքը դրվել է, բայց ժամանակն է, որ դրանք փոխեն:

Ա.Աշոտյանն ասաց, որ ինքն առաջարկել է, որպեսզի միջազգային ասպարեզում իրենց որակն ապացուցած դասագրքերը թարգմանեն, հայաֆիկացնեն և տեղայնացեն Հայաստանում, սակայն հայ գիտնականները դեմ են արտահատվել այդ առաջարկին:

«Եթե կա լավը, ինչու հորինել մեր հեծանիվը»,-նշեց նա:

Դիմելով աշակերտներին՝ Ա. Աշոտյանն ասաց, որ նրանք պատմական շանս ունեն, թեկուզ ինքը նախարար չլինի, ապա այդ ժամանակվա նախարարից և նախարարությանը պետք է ստիպեն, որպեսզի փոխեն դպրոցական ծրագիրը և հանեն այն դասագրքերը, որոնք մեզ այլևս պետք չեն: