Ձեր վստահելի աղբյուրը

«Բավականին հարցեր կային, որոնց սպառիչ պատասխաններ ստացանք», -Հայաստանի նախագահի հետ հանդիպումից հետո Panorama.am-ի թղթակցի հետ զրույցում ասաց Ազգային ժողովի պատգամավոր Արագած Ախոյանը:

Նախագահի հետ հանդիպման թեման Սահմանադրության նախագիծն է եղել, և Ախոյանի հետ միասին հանդիպմանը մասնակցել են նաև պատգամավորներ Արայիկ Գրիգորյանը, Գրիգորի Մարգարյանը, Բազմասեր Առաքելյանը, Մարտուն Գրիգորյանը, Մուշեղ Պետոյանը, Դավիթ Քոչարյանը, Ռուստամ Գասպարյանը, Կարո Կարապետյանը, Հարություն Ղարագյոզյանը: Վերջինները, հիշեցնենք, «Բարգավաճ Հայաստան» կուսակցության հետ փետրվարյան հայտնի դեպքերի արդյունքում հեռացել էին ԱԺ «Բարգավաճ Հայաստան» կուսակցությունից ու նույնանուն խմբակցությունից և ԱԺ-ում լրացրել անկուսակցականների շարքը:

Արագած Ախոյանին, պարզվեց, անհանգստացրել են միայն Սահմանադրության նախագծում ընտանիքի ձևավորման մոդելի շուրջ խոսակցությունները, սակայն նրա խոսքով, դրա վերաբերյալ իր մտահոգությունները «նախագահը փարատել է»:

«Նախագծում հստակ գրված է, որ հայ ընտանիքը բաղկացած է բացառապես կնոջից և տղամարդուց, այսինքն` դրանով ամեն ինչ ասված է: Մինչդեռ շահարկվում էր միասեռական ամուսնություններ և այլն, և այլն: Նման բան գոյություն չունի: Իսկ դա մեր ամենամեծ մտահոգությունն էր», -ասաց Ախոյանը:

-Սահմանադրության նախագծում այլ հարցեր Ձեզ չե՞ն հետաքրքրել, Պարոն Ախոյան, օրինակ խորհրդարանական կառավարման մոդելի մասին, խորհրդարանի ընտրությունների 2-րդ փուլի մասին:
-Տարբեր հարցեր հնչեցին տարբեր մարդկանց կողմից խորհրդարանական ընտրությունների, կառավարման մոդելի մասին և կարծում եմ, որ վատ չի 100 տոկոս համամասնական ընտրություններին անցնելը:

-Դուք Ձեզ նոր ու ապագա խորհրդարանում պատկերացնո՞ւմ եք և հատկապես որ կուսակցության ցուցակում: Ինչպիսի՞ն է լինելու Ձեր քաղաքական ապագան:
-Անկեղծ ասած դրա մասին խոսելը դեռ շատ շուտ է, ինչպես ասում են` ճտերը աշնանն են հաշվում: Երբ մենք կավարտենք մեր մեկ ու կես տարվա գործունեությունը, այն ժամանակ մի հատ ինքներս մեզ կշռել ու կորոշենք` արդյոք մենք պե՞տք ենք հայաստանյան քաղաքական կյանքում, խորհրդարանում լինել-չլինելու հարցը: Դրա մասին այսօր խոսելը ճիշտ չէ:

-Ձեր կարծիքով, ինչո՞ւ է նախագահը ուշադրություն դարձրել Ձեր խմբին, հրավիրել հանդիպման:
-Նախագահը նույնիսկ հանդիպել է այնպիսի կուսակցությունների հետ, որոնք կազմված են մեկ կամ երկու անձանցից: Այդ դեպքում ինչպես կարող էր չհանդիպել այն մարդկանց հետ, ովքեր դե-ֆակտո, լուսանցքից դուրս չեն, ովքեր կուսակցական պատկանելությունից հրաժարվել էին:

-ԲՀԿ վերադարձը հնարավոր համարո՞ւմ եք, պարոն Ախոյան:
-Գիտեք, ես կաշխատեմ մնալ անկուսակցական: Ես այսօր ոչինչ չունեմ ասելու ԲՀԿ-ի դեմ, ընդհակառակը, տեսնում եմ վարքագծի փոփոխություն, մոտեցումների փոփոխություն, ինչն էլ ավելի ընդունելի է իմ կողմից: Բայց կոնկրետ վերադարձի մասին խոսք լինել չի կարող: Եթե բնականաբար որոշվեց, որ ես պետք է զբաղվեմ քաղաքականությամբ, այն էլ Ազգային ժողովում, բնականաբար միմիայն պետք է լինել կուսակցական, ու անխուսափելի կարող է լինել որևէ կուսակցության անդամակցելը:

Իսկ դա կարո՞ղ է լինել ՀՀԿ-ն:
-Ոչինչ չի բացառվում: Ոչինչ: Եկեք այդ մասին չխոսենք, լա՞վ:

-Դուք ասում եք` «եթե որոշվեց»: Ո՞վ պետք է որոշի:
Առաջին հերթին` ես և բնականաբար, իմ այն մտերիմները, ընկերները որոնց խոսքը ինձ համար արժեք ունի և որոնք ինձ կարող են ճիշտ խորհուրդներ տալ: