Ձեր վստահելի աղբյուրը

Սահմանադրության փոփոխությունների նախագծում կայուն մեծամասնության և 2-րդ փուլի անցկացման վերաբերյալ դրույթները Սահմանադրական բարեփոխումների մասնագիտական հանձնաժողովի անդամների հետ քննարկման արդյունքում ամենայն հավանականությամբ կվերաշարադրվի կամ կխմբագրվի: Այդ մասին այսօր Panorama.am-ի թղթակցի հետ զրույցում տեղեկացրեց ԱԺ Պետական-իրավական հարցերի մշտական հանձնաժողովի նախագահ Հովհաննես Սահակյանը:

«Սահմանադրության 89-րդ հոդվածը Հանձնաժողովի անդամների հետ քննարկելու ժամանակ ամենայն հավանականությամբ կվերաշարադրվի կամ կխմբագրվի, և այն մտահոգությունները, որոնք առկա են, կարծես թե կփարատվեն», -հավելեց Սահակյանը: Նա, սակայն, չմանրամասնեց, թե ինչպիսին կարող է լինել հոդվածը և ասաց, որ քննարկումների արդյունքում ընդհանուր հայտարարի կգան:

Ընդհանուր առմամբ, ամփոփելով լսումների արդյունքները, Սահակյանն ասաց, որ Սահմանադրության փոփոխությունների նախագծի թեմայով խորհրդարանական լսումները դրական էին ու գնահատելի:

«Լսումները շատ դրական էին: Դրանք ստացվեցին նախևառաջ մասնակիցների մեծ թվի առումով: Հնչեցին 40-ից ավելի ելույթներ, 35 ու ավելի հարց ու պատասխան: Մենք որդեգրել էինք հետևյալ սկզբունքը` ոչ մի մասնակցի խոսելու, արտահայտվելու իրավունքը չպետք է սահմանափակվի և բոլորն էլ, ովքեր ցանկացել են տվել են հարց, ունեցել ելույթ: Մեզ մոտ ստացվեց այն, ինչի համար հավաքվել էինք», -հավելեց Սահակյանը:

Նա տեղեկացրեց, որ լսումների ընթացքում ստացված բոլոր առաջարկություններն ու Նախագծի վերաբերյալ մտահոգությունները Սահմանադրական բարեփոխումների մասնագիտական հանձնաժողովի անդամների հետ քննարկման առարկա կդառնան գլխադասային ԱԺ Պետական-իրավական հարցերի մշտական հանձնաժողովում:

Ամբողջ լսումների ընթացքում արտահայտված մտահոգությունները` ՀՀ Սահմանադրությանը չհամապատասխանող միջազգային պայմանագրերի վավերացման, ընտանիքի ձևավորման, կայուն մեծամասնության, անվտանգության հարցերի վերաբերյալ, ըստ Սահակյանի, առանձնացվել են և կքննարկվեն մանրամասն:

Լսումները կազմակերպած ԱԺ Պետական-իրավական հարցերի մշտական հանձնաժողովի նախագահը նկատեց, որ լսումներին ներկա են եղել նաև «Չեք անցկացնելու» նախաձեռնության անդամ երիտասարդները, որոնք, սակայն ԱԺ-ում լսումներին ներկայացել են այլ կազմակերպության անվան տակ:

«Ես շատ ուրախացա, որ նրանց տեսա դահլիճում, բայց տխրեցի, որ նրանք այլ կազմակերպության անվան տակ էին ԱԺ մուտք գործել: Եթե նրանք հենց «Չեք անցկացնելու» նախաձեռնության անվամբ գային, միանշանակ, կընդունեինք, քանի որ նրանց տեսակետը Ազգային ժողովում բովանդակային լսելու առումով շատ կարևոր էր: Իսկ այդ երիտասարդները իսկապես բովանդակային կերպով փորձում են արտահայտել իրենց մտահոգությունը, ասել, թե ինչու չեն ուզում անցկացնել Նախագիծը», -հավելեց պատգամավորը:

Ինչ վերաբերում է Նախագծի վերջնական տարբերակի` ԱԺ-ում քննարկվելու ժամկետներին, ապա Սահակյանը տեղեկացրեց, որ Կառավարության կողմից Նախագիծը հաստատելու մասին որոշումը ԱԺ-ին տրամադրելուց հետո այն կքննարկվի ԱԺ Պետական-իրավական հարցերի մշտական հանձնաժողովում: Դրանից հետո միայն Նախագիծը կընդգրկվի ԱԺ լիագումար նիստի օրակարգ: «Եթե կոնկրետ ժամկետներ չդրվեն, ապա կարծում եմ, որ սեպտեմբերի վերջին Նախագիծը կքննարկվի մեր հանձնաժողովի նիստում», -ասաց ԱԺ Պետական-իրավական հարցերի հանձնաժողովի նախագահը: