Ձեր վստահելի աղբյուրը

ՀՀԿ խմբակցության անդամների և սահմանադրական բարեփոխումների հանձնաժողովի անդամների երկօրյա հանդիպումների ընթացքում ՀՀԿ-ական պատգամավորները հանդես են եկել մի շարք առաջարկություններով, որոնց մեծ մասը վերաբերել են սահմանադրական փոփոխությունների նախագծով առաջարկվող կայուն մեծամասնության դրույթին: Լրագրողների հետ հանդիպման ժամանակ ասաց ԱԺ ՀՀԿ խմբակցության անդամ, ԱԺ ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը:

«Կարծես թե ձեռք է բերվել ոսկե միջին, որը մի կողմից չափազանց լայն հնարավորություն է տալիս առաջին փուլը հաղթահարած ուժերին, երկրորդ՝ թույլ չի տալիս պերմանենտ խորհրդարանական ընտրություններ անցկացնել, և պետությունը մնա առանց կառավարության»,- նշեց նա:

Գ. Մինասյանի ներկայացմամբ, քննարկումների ժամանակ եկել են մի տարբերակի, ըստ որի՝ ընտրության առաջին փուլից հետո, եթե որևէ մի ուժ մեծամասնություն չի ստանում, ապա առաջին փուլը հաղթահարած քաղաքական ուժերը կարող են ստեղծել կոալիցիա ու այդ կոալիցիայով ստանալ մեծամասնություն, այսինքն՝ ամեն- ինչ կարող է ավարտվել առաջին փուլուվ:

«Կարևոր է, որ այստեղ որևէ սահմանափակում չկա. չի բացառվում, որ կոալիցիայի մեջ ինչ որ ուժ չհայտնվի, այդ թվում նաև չհայտնվի դոմինանտ ուժը: Այսինքն, կարող է մի ուժ ստացել է 40 տոկոս ու չի ուզում որևէ մեկի հետ կոալիցիայի մեջ մտնել, և մյուս 60 տոկոս ստացած ուժերը կարողանում են միավորվել ու 50 և ավելի տոկոս ձեռք բերել: Սա չափազանց լայն հնարավարություն է, որ առաջին փուլով ընտրություններն ավարտվեն: Սակայն եթե չի ստացվում, խորհրդարանն այդ ժամանակ կարող է հնարավորություն ունենալ առաջարկել երկրորդ փուլ՝ իր ընտրական օրենսգրքով»,- ասաց ՀՀԿ-ական պատգամավորը:

Նա նաև նշեց, որ սահմանադրական փոփոխությունների նախագծի որոշ դրույթների վերաբերյալ այս կամ այն չափով կա կոնսենսուսային մոտեցում, ինչը ձեռք է բերվել վերջին երկու շաբաթվա ընթացքում տեղի ունեցած քննարկումների արդյունքում:

Գագիկ Մինասյանը կարևորեց նման քննարկումներին քաղաքական բոլոր ուժերի, քաղհասարակության ներկայացուցիչների մասնակցությունը:

«Ցավոք, ոչ բոլոր մասնակիցներն էին, որ իրազեկված էին այն ձևակերպումներից, որոնք ներկայացված են սահմանադրական փոփոխությունների՝ ԱԺ ուղարկված նախագծում: Քննարկումների ժամանակ խոսում էին այնպիսի ձևակերպումների մասին, որոնք այս տարբերակում չկան»,- նշեց պատգամավորը:

Գ. Մինասյանը նշեց, որ քննարկումների ժամանակ «Չեք անցկացնի» քաղաքացիական նախաձեռնությունը մտահոգություն էր հայտնում, թե՝ «կարող եք գործող սահմանադրության մեջ ցույց տալ այն ճգնաժամային իրավիճակը, որը պարտադրում է կառավարման համակարգի փոփոխության»:

«Գործող կառավարման կիսանախագահական համակարգն ունի այդ ճգնաժամը: Մենք ականատես ենք եղել մեր երկրում: Դրա մասին բազմաթիվ անգամներ խոսել են մեր շատ ընդդիմախոսներ:

Սահմանադրությամբ ունենք երկու առաջնային մանդատ՝ Հայաստանի նախագահ և խորհրդարանի մեծամասնություն, որոնք կարող են ներկայացնել տարբեր ուժեր, այդկերպ տարբեր հարցերի շուրջ՝ ներքին, արտաքին, պաշտպանական, ունենալով տարբեր տեսակետներ:

Այս դեպքում տեսնում ենք ճգնաժամի սաղմերը ամբողջ էությամբ, եթե տարբեր տեսակետներ են ներկայացնում, ապա անխուսափելի է իշխանության մեջ երկու առաջանային մանդատ ունեցող ուժերի հակամարտությունը և նույնսիկ հնարավոր է ծայրահեղ դրսևորում ստանալ: Մյուս դեպքում, եթե երկու առաջնային մանդատ ունեցողները նույն քաղաքական ուժի ներկայացուցիչ են, այս դեպքում էլ ստացվում է իշխանության գերկենտրոնացում, այն, ինչ մասին խոսում են վերջին տարիներին մեր ընդդիմախոսները: Այո, այդպես է»,- ասաց Գ. Մինասյանը:

Նախորդող հրապարակում`
89-րդ հոդվածի վերաբերյալ Վենետիկի հանձնաժողովի առաջարկը հնարավոր է ընդունվի