Ձեր վստահելի աղբյուրը

Կապանի Մշակույթի կենտրոնի դահլիճում այսօր ելույթ է ունենալու Հայաստանի պետական երիտասարդական նվագախումբը՝ ներկայացնելով Hollywood Non-Stop ծրագիրը: Այս մասին տեղեկանում ենք նվագախմբի պաշտանական կայքից:

Սեպտեմբերի 9-ին Hollywood Non-Stop-ը կունկնդրեն հեռավոր Մեղրիում՝ Մեղրու մշակույթի պալատի դահլիճում։ Հոկտեմբերի 5-ին հոլիվուդյան ֆիլմերի երաժշտությունը կներկայացվի Գյումրու Վարդան Աճեմյանի անվան դրամատիկական թատրոնում։

Նշենք, որ Հայաստանի պետական երիտասարդական նվագախումբը և Հայաստանում ԱՄՆ դեսպանատունը ներկայացնում են Hollywood Non-Stop ծրագիրը մարզերում։ Առաջին ելույթը տեղի է ունեցել սեպտեմբերի 7-ին Գորիսի Վաղարշ Վաղարշյանի անվան պետական դրամատիկական թատրոնում:

«Երբեք մեր մարզերի բնակիչներին ինչ-որ ծրագրային փաթեթ չի առաջարկվել: Սակայն նրանք դրա կարիքն ունեն: Մենք սկսում ենք պարզ դասականից: Այս ծրագիրը ներկայացնելով, երկու-երեք տարվա ընթացքում կներկայացնենք ավելի խիստ դասական երաժշտություն՝ ավելի պատրաստված ունկնդրի համար»,- ավելի վաղ Panorama.am-ի հետ զրույցում ասել էր Հայաստանի պետական երիտասարդական նվագախմբի գեղարվեստական ղեկավար և դիրիժոր Սերգեյ Սմբատյանը:

Հիշեցնենք, որ Երիտասարդական նվագախումբը 2012-ից իրականացնում է Non-stop ծրագիրը, որի ընթացքում հնչել են հոլիվուդյան հայտնի ֆիլմերի սաունդթրեքները՝ «Hollywood Non-stop»: Այնուհետև հանդես է եկել «Cartoon Non-stop» համերգաշարով, որի ընթացքում հնչել են հայտնի մուլտֆիլմերի սաունդթրեքները: Նախորդ տարի նվագախումբը ներկայացրել է «Hayfilm Non-stop», որի ընթացքում հնչել են հայկական ֆիլմերի երաժշտություն:

Նախորդող հրապարակում՝
«Non-stop»-ի տրամաբանական շարունակությունը՝ «Mosfilm»