Ձեր վստահելի աղբյուրը

Հունաստան կատարած այցելության ընթացքում Մեծի Տանն Կիլիկիո Ն.Ս.Օ.Տ.Տ. Արամ Ա. Վեհափառ Հայրապետը հարցազրույց է տվել հունական pontos-news.gr կայքին, որի ժամանակ անդրադարձել է Սիսի կաթողիկոսարանի և հարակից կալվածքների վերադարձի պահանջով Թուրքիայի դատարանում բացված դատին: Այս մասին հայտնում է «ԵՌԱԳՈՅՆ» կայքը:

«Այս հարցը մենք քննարկել ենք նույնիսկ թուրք իրավաբանների, միջազգային իրավունքի, մարդու իրավունքի մասնագետների հետ: Ուսումնասիրել ենք Լոզանի պայմանագիրը: Այսինքն մենք խնդիրն ուսումնասիրել ենք համակողմանի»,-ասել է կաթողիկոսը՝ ավելացնելով, որ անկախ նրանից Թուրքիան իր կատարած ոճիրը կընդունի, թե ոչ, կատարվածը փաստացի Ցեղասպանություն է:

«Դա ոչ ոք չի հորինել, իսկ Ցեղասպանության հետևանքը շատ լուրջ է: Մեր ժողովրդի ողջ ունեցվածքը, համայնքային շենքերը, եկեղեցիներն ավերված են կամ հիմնովին, կամ մասնակի, և դրանց մեծ մասը Թուրքիայի ղեկավարությունը սեփականացրել է: 100 տարի անց, որպես կաթողիկոս, հայտարարում եմ, որ այդ կառույցները պատկանում են հայկական եկեղեցուն, հայ ժողովրդին: Մենք սկսում ենք Սիսի կաթողիկոսարանի վերադարձը, քանի որ դատն ունի քաղաքական, բարոյական, հոգևոր իմաստ»,-նշել է Վեհափառ Հայրապետը:

Արամ Ա. Կաթողիկոսը շեշտել է, որ առաջին անգամ է, որ Հայոց ցեղասպանության ճանաչման համար պայքարող հայ ժողովուրդը նոր ռազմավարություն է ընտրել՝ հարցը բարձրացնելով նաև դատարանում: