Ընտրողն է որոշելու, թե որ քաղաքական ուժը ստանձնի կառավարման ղեկը. Սահմանադրագետ
Կայուն խորհրդարանական մեծամասնություն ունենալու նպատակով Սահամանադրության բարեփոխումների նախագիծը նախատեսում է խորհրդարանական ընտրությունները 2 փուլով անցկացնելու հնարավորություն, եթե 1-ին փուլի արդյունքներով կամ քաղաքական կոալիցիա կազմելու միջոցով կայուն խորհրդարանական մեծամասնություն չի ձևավորվում: Այդ մասին այսօր Ազգային ժողովում Սահմանադրության բարեփոխումների նախագիծը ներկայացնելիս հայտարարեց ԱԺ-ում ՀՀ նախագահի ներկայացուցիչ, Սահմանադրական բարեփոխումների մասնագիտական հանձնաժողովի անդամ Վարդան Պողոսյանը:
«Նման երկփուլանոց համակարգի սկզբունքային առավելությունն այն է, որ ընտրողը հնարավորություն է ստանում բացի խորհրդարանի ձևավորումից, ուղղակիորեն որոշել, թե որ քաղաքական ուժն է ստանձնելու կառավարման ղեկը: Կառավարությունը փաստացի այդ դեպքում որոշվում է ընտրողի կողմից, այլ ոչ թե նրա թիկունքում խորհրդարանում ներկայացված կուսակցությունների կողմից», -ներկայացրեց Պողոսյանը:
Սահմանադրագետի խոսքով, նման համակարգը, ըստ էության, հնարավորություն է տալիս մեկտեղել խորհդրարանական ու նախագահական համակարգերի առավելությունները:
Խորհրդարանական համակարգի առանձնահատկությունները ներկայացնելիս, Պողոսյանն ասաց, որ դրա գոյության պարագայում երկբևեռ կուսակցական համակարգի ձևավորմանը:
«Երկբևեռ կուսակցական համակարգը բնորոշվում է նրանով, որ քաղաքական դաշտում առկա են երկու հիմնական բևեռներ` կուսակցությունների կամ կուսակցությունների դաշինքի տեսքով, որոնք մրցակցում են միմյանց հետ` իշխանության ղեկը ստանձնելու համար: Եթե նման երկբևեռ կուսակցական համակարգ ձևավորվի, ապա ԱԺ հաջորդ ընտրությունների ժամանակ, ընտրողը հնարավորություն կստանա գնահատել այդ կառավարության գործունեության արդյունքները, համապատասխան հետևություններ անել և իր քվեն տալ կամ նույն մեծամասնությանը կամ ընդդիմադիր ուժին», -հայտարարեց Պողոսյանը:
Սահմանադրության բարեփոխումների նախագիծը սահմանում է պատգամավորների քանակի միայն նվազագույն շեմը`101 պատգամավոր:
«Այս կարգավորման նպատակն այն է, որ եթե ընտրությունների 1-ին փուլում որևէ կուսակցության կամ կուսակցությունների դաշինքի չի հաջողվում ձևավորել կայուն մեծամասնություն և եթե ընտրությունների 2-րդ փուլ է անցկացվում, ապա 2-րդ փուլում հաղթած կուսակցությունը կամ դաշինքը ոչ թե լրացուցիչ մանդատներ է ստանում 1-ին փուլը հաղթահարած բայց չհաղթած կուսակցությունների դաշինքների հաշվի, այլ դրանով հնարավորություն է ընձեռվում, որ այդ կուսակցությունները պահպանեն իրենց մանդատները, որոնք ձեռք են բերում առաջին փուլի արդյունքներով», -բացատրեց մասնագետը:
Հարակից հրապարակումներ`
Սահմանադրական բարեփոխումների հանձնաժողովի անդամը՝ կիսանախագահական համակարգի առանցքային խնդիրների մասին
Պառլամենտական համակարգում պատահական անձանց իշխանության գալու վտանգը մեղմվում է. Վ. Պողոսյան
Լրահոս
Տեսանյութեր
Դուք մասնակից եք դարձել պետականության կործանմանը. Բագրատ Սրբազանը՝ ՔՊ-ականներին
