Ձեր վստահելի աղբյուրը

Գաֆէսճեան արվեստի կենտրոնում սեպտեմբերի 18-ին բացվելու է «Կամո Նիգարյան. Շիզոպոլիս» ցուցադրությունը: Արվեստի կենտրոնից տեղեկացնում են, որ ուժի և խելագարության հարաբերակցության թեման համակցում է Կամո Նիգարյանի (1950-2011 թթ)` այս ցուցահանդեսում առաջին անգամ մեկտեղած տասնյոթ աշխատանքները։ Ուրվագծելով Նիգարյանի ստեղծագործական ուղին` 1980-ականներից մինչև 2000-ականները, «Շիզոպոլիսը» բացահայտում է նրան որպես 20-րդ դարի վերջի հայ արվեստի առաջադեմ, հակահամակարգային ներկայացուցիչներից մեկը։

Կամո Նիգարյանը ծնվել է 1950-ին պատմական Հայաստանի Գարդմանք գավառի Հելենդորֆում (ներկայիս Ադերբեջանի տարածք), մտավորականների ընտանիքում։ Կարճ ժամանակ անց նրանք հաստատվում են Երևանում, որտեղ 1973-ին Նիգարյանն ավարտում է Երևանի պետական գեղարվեստա-թատերական ինստիտուտի դիզայնի ֆակուլտետը: Աշխատելով դիզայնի բնագավառում իր ողջ ստեղծագործական ուղու ընթացքում՝ արվեստագետի ստեղծած բազմաթիվ թատերական, ցուցահանդեսային և կինո ազդագրերը, ինչպես նաև յոթ թանգարանային ցուցադրությունների գեղարվեստական նախագծերը եզակի տեղ են գրավում հայկական դիզայնի պատմության մեջ: Նա ակտիվ գործունեություն է ծավալում ուշ խորհրդային շրջանի Երևանի ընդհատակյա արվեստային շրջանակներում՝ մասնակցելով մի շարք պերֆորմանսների և նոն-կոնֆորմիստական ցուցահանդեսների, ինչպես օրինակ 1982-ի «Հափենինգ»-ի կազմակերպմանը: 1980-ից սկսած Նիգարյանը հետզհետե կենտրոնանում է գեղանկարչության և լուսանկարչության վրա՝ իր ստեղծագործությունների միջոցով շարունակաբար ստանձնելով սադրիչ և քննադատական դիրքորոշում պետական ու զանգվածային մշակույթի գաղափարաբանությունների հանդեպ։

«Որպես սովետական ռեժիմի վերջին տասնամյակներին ասպարեզ իջած այլախոհ արվեստագետ` նրան խորապես մտահոգում էր միատարր հասարակության և գլոբալ տնտեսության մեջ տրոհվող անհատի ազատությունը և կամքը: Ազդագրային ու ցուցահանդեսային ձևավորումներից մինչև գեղանկարչություն ու լուսանկարչություն` Նիգարյանի արվեստը զննում է մարդկության ներկայիս վիճակը` որպես խորագույն վախի, պարադոքսի ու անտարբերության մեջ խրված մի երևույթ: Իր գաղափարները քաղելով փիլիսոփայությունից, հոգեվերլուծական, մարդաբանական, տնտեսագիտական տեսություններից և անգամ գիտաֆանտաստիկ գրականությունից` արվեստագետն ի ցույց էր դնում հասարակական ու քաղաքական համակարգերի ենթաշերտային տեռորը, որի ճնշման տակ ուժը դառնում է սպառողական ապրանք և իշխելու բանաձև։ Էքսպրեսիոնիզմի, սյուրռեալիզմի ու փոփ-արվեստի ավանդույթների հետ համարձակ փորձարկումները Նիգարյանի համար նաև միջոց էին արտահայտելու իր տագնապը արդի քաղաքակրթության ճգնաժամի հանդեպ: Նրա գործերում պատմությունն ու ժամանակակից կյանքը գոյակցում են նույն տարածության մեջ՝ անընդհատ կենդանացնելով այն համակարգերը, որոնք բերում են պահպանողականության, պատերազմների ու քաոսի:

Որպես սարսափների մի դահլիճ` «Շիզոպոլիսը» հնարավորություն է տալիս դիտարկելու իրականության այս հակառակ կողմը և մտորելու մեր առօրյա գոյության մեջ արմատակալած անգիտակից խելագարության մասին»,- նշում է ցուցադրության համադրող Վիգեն Գալստյանը:

ԳԱԿ գործադիր տնօրենի պաշտոնակատար Վահագն Մարաբյանի խոսքով, Գաֆէսճեան արվեստի կենտրոնը ներկայացնելու է ուշ և հետխորհրդային ժամանակաշրջանի հայ առանցքային նոն-կոնֆորմիստ արվեստագետ Կամո Նիգարյանի աշխատանքները. «Ներկայացնելով արվեստագետի թեմատիկ շարքերի հազվագյուտ ցուցադրված աշխատանքների ընտրանի, ինչպես նաև Ս. Մերկուրովի թանգարանում գտնվող մահադիմակներով ինստալացիայի կրկնօրինակը՝ «Կամո Նիգարյան. Շիզոպոլիս» ցուցադրությունն առաջարկում է Նիգարյանի խորը ինտելեկտուալ ստեղծագործական ժառանգության նոր տեսանկյուն»:

Ցուցադրությունը գործելու է 2015 թվականի սեպտեմբերի 18-ից դեկտեմբերի 20-ը: Սրահի մուտքը լինելու է անվճար սեպտեմբերի 19-ին և 20-ին:

Նախորդող հրապարակումներ՝
«Կամո Նիգարյան. Շիզոպոլիս». Իշխանության և բռնության հարաբերության թեման համակցող 17 աշխատանք՝ մեկ տեղում
Կամո Նիգարյան… Դիզայնից մինչև դիալեկտիկ արվեստ