Ձեր վստահելի աղբյուրը

Խաղողի մթերման աշխատանքները թեև նորմալ ընթանում են, սակայն գինու արտադրության համար մթերվող խաղողի հետ կապված որոշակի խնդիրներ կան: Այս մասին Panorama.am-ի թղթակցի հետ զրույցում ասաց Հայրենական ապրանք արտադրողների միության նախագահ Վազգեն Սաֆարյանը:

Մթերման հետ կապված խնդիրը, ըստ նրա, կապված է ֆինանսական միջոցների բացակայության հետ. «Գինի արտադրողները ռուսական շուկայում իրացման հետ կապված դժվարություններ են ունեցել: Մայիսին ռուսական շուկա 3,5 մլն դոլարի ապրանք է արտահանվել և այսօր նրանք շրջանառու միջոցների պակաս ունեն, ուստի չեն կարողանան մթերում կազմակերպեն»,- նշեց նա:

Նրա խոսքերով, որպեսզի ընկերությունները խաղող մթերեն, դրա համար պետք է վարկ վերցնեն: Սակայն Վ.Սաֆարյանը գտնում է, որ ՀՀ կառավարությունը այս հարցում պետք է աջակցի մթերող ընկերություններին:

«Թեև կառավարությունն այդ վարկերը որոշ չափով սուբսիդավորում է, բայց պետք է այնպես կազմակերպի ամբողջ գործընթացը, որպեսզի ոչ գյուղացին, ոչ էլ մթերողները չտուժեն: Իհարկե գյուղատնտեսության նախարարը հայտարարել է, որ չմթերված խաղող այգիներում չի մնալու, հիմա տեսնենք, թե ինչպես այդ ամբողջ գործընթացը կընթանա»,- ասաց Վ.Սաֆարյանը՝ հավելելով, որ այն ընկերությունները, որոնք ցանկանում են խաղող մթերել, բայց գումար չունեն, ապա պետությունը պետք է նրանց գումար տրամադրի:

Անդրադառնալով վարունգի մթերմանը, Վ.Սաֆարյանն ասաց, որ այս դեպքում նույնպես մթերողները կանգնել են խնդրի առաջ. գումար չունեն. «Դրա համար պետություն-մասնավոր համագործակցությունը պետք է իրականություն դառնա: Պետք է ճկուն լինեն, որպեսզի ոչ գյուղացին, ոչ մթերող ընկերությունը, ոչ էլ կառավարությունն այս ամենից չտուժի»:

Նշենք, որ Արմավիրի մարզի մի շարք համայնքների գյուղացիները տասնյակ տոննա վարունգ են նետում աղբանոց՝ չգտնելով իրացման ոչ մի հնարավորություն:

Դիտարկմանը, թե արդյոք այս ամենը չի հանգեցնի նրան, որ գյուղացիները հրաժարվեն վարունգի մշակումից, Վ.Սաֆարյանն ասաց, որ նման մտավախություն միշտ էլ կա: Ըստ նրա, եթե գյուղացին տեսնում է, որ մի տարի կարտոֆիլը առատ է լինում, ապա հաջորդ տարի ավելի քիչ է մշակում, ինչից հետո արդեն կարտոֆիլի դեֆիցիտ է լինում:

«Նույնը կարող է վարունգի հետ լինի և հաջորդ տարի ավելի քիչ վարունգ ունենանք: Շուկայական հարաբերություններ են, մեկ լինում է գերարտադրություն, մեկ՝ նվազում: Շուկան ինքնակարգավորման մեխանիզմներ չունի, դրա համար շուկային բնորոշ են և լճացումները, և ճգնաժամերը»,- ասաց Վ.Սաֆարյանը: