Ռոյսը և Էնգելը կոչ են անում ԱՄՆ-ին և ԵԱՀԿ-ին հրաժարվել Ադրբեջանի նկատմամբ կեղծ հավասարությունից
ԱՄՆ ներկայացուցիչների պալատի արտաքին հարաբերությունների հանձնաժողովի նախագահ Էդ Ռոյսը և բարձրաստիճան դեմոկրատ Էլիոթ Էնգելը Կոնգրեսի իրենց գործընկերներին կոչ են անում միանալ երկու պալատների նախաձեռնությանը՝ ուղղված Լեռնային Ղարաբաղի շփման գծի երկայնքով խաղաղության պահպանմանը, հայտնում է Ամերիկայի Հայ Դատի գրասենյակը։
Երկու ավագ օրենսդիրները կոնգրեսական նամակ-ստորագրահավաք են սկսել՝ ուղղված ԵԱՀԿ Մինսկի խմբում ԱՄՆ ներկայացուցիչ դեսպան Ջեյմս Ուորլիքին։ Այդ նամակում, մասնավորապես, կոչ է արվում Միացյալ Նահանգներին և ԵԱՀԿ-ին ագրեսիվ գործողություններին արձագանքելիս հրաժարվել կեղծ հավասարությունից՝ նշելով, որ «Յուրաքանչյուր նոր հարձակման դեպքում բռնություններից հրաժարվելու վերաբերյալ Միացյալ Նահանգների և ԵԱՀԿ՝ բոլոր կողմերին ուղղված ընդհանուր կոչերի երկարաժամկետ փորձը ձախողվել է իրադրության լարումը նվազեցնելու իր առաքելությունում։ Ընդհակառակը, արհեստական անկողմնակալության այս քաղաքականությունը շռայլորեն նպաստել է լարվածության աճին։ Որևէ խաղաղություն չի կարող լինել առանց պատասխանատվության»։
Նամակում ներկայացվում են խաղաղությանն ուղղված երեք հստակ քայլ, որոնք «կարճաժամկետ առումով փրկելու են կյանքեր և աջակցելու են պատերազմի կանխմանը։ Երկարաժամկետ առումով, այդ քայլերը նպաստելու են տարածաշրջանի բոլոր քաղաքացիների համար համընդգրկուն և երկարատև խաղաղության հաստատմանը»։
Այդ քայլերն են՝
- բոլոր կողմերի համաձայնությունը՝ հրաժարվել շփման գծում դիպուկահարների տեղակայումից
- շփման գծի երկայնքով հարձակումների աղբյուրը որոշելու նպատակով ԵԱՀԿ կողմից համապատասխան սարքավորման տեղակայում
- հրադադարի խախտումներն առավել արդյունավետ դիտարկելու նպատակով շփման գծի երկայնքով ԵԱՀԿ լրացուցիչ դիտորդների տեղակայում
- Հայաստանը և Լեռնային Ղարաբաղը իրենց աջակցությունն են հայտնել կյանքերի փրկմանն ուղղված այս նախաձեռնություններին, իսկ Ադրբեջանը՝ ոչ։
«Մենք ցանկանում ենք շնորհակալություն հայտնել նախագահ Ռոյսին և Կոնգրեսի ավագ անդամ Էնգելին խաղաղության պահպանման, պատերազմի կանխման ու Լեռնային Ղարաբաղի կարգավիճակին և անվտանգությանը վերաբերող հարցերի շուրջ կայուն և արդար բանակցությունների միջոցով հանգուցալուծման գործում ցուցաբերած առաջնորդության համար»,- ասել է Հայ Դատի գրասենյակի գործադիր տնօրեն Արամ Համբարյանը։
Լրահոս
Տեսանյութեր
Եթե Ադրբեջանը վստահ է, ինչո՞ւ է դատական գործընթացները դադարեցնելու մասին գաղափար առաջ քաշում
