Ձեր վստահելի աղբյուրը

Մեր նպատակն է առավելագույնս աջակցել իրենց կյանքի գնով հողը մշակող սահմանամերձ համայնքների բնակիչներին՝ բերքի իրացումն առանց խոչընդոտների կազմակերպելու հարցում: Այս մասին հայտարարել է գյուղատնտեսության նախարար Սերգո Կարապետյանը, ով խաղողի մթերման կազմակերպման աշխատանքներին հետևելու նպատակով Տավուշի մարզում էր:

Նախարարության հասարակայնության հետ կապերի վարչության փոխանցմամբ, Այգեհովիտ համայնքում նախարարը զրուցել է խաղողագործների հետ, որոնք մեծ դժվարությամբ են հավաքում խաղողի բերքը: Նախարարը հորդորել է առաջին հերթին հետևել իրենց անվտանգությանն ու զգոնություն պահպանել։

Երևանի կոնյակի գործարանի Բերդի մասնաճյուղի տնօրեն Գարիկ Վարդանյանի տեղեկացրել է, որ ընկերությունն օրական մթերում է 200 տոննա խաղող, ընդ որում, ամբողջությամբ Տավուշի մարզից: Խաղողագործների հետ կնքված պայմանագրերով նախատեսվում էր մթերել 4100 տոննա խաղող:

Այնուհետև նախարարն ուղևորվել է դեպի Այգեպարի գինու գործարան: Այստեղ խաղողի մթերումները կսկսվեն սեպտեմբերի 28-ից: Թեև նախապես պայմանագրեր չեն կնքվել գյուղացիների հետ, սակայն պատասխանատուները հավաստիացրել են՝ պատրաստ են մթերել ամբողջ բերքը:

Նախարարը հավաստիացրել է խաղողագործներին, որ չնայած վերամշակող ընկերությունները խնդիրներ ունեն, սակայն նախորդ տարվա մթերման գինը կպահպանվի, բերքն ամբողջ ծավալով կմթերվի: Նախարարը հայտնել է, որ մի քանի օրից կվերագործարկվի տեղի մթերման կետը, նախարարությունը նաև կհետևի, որպեսզի մթերված խաղողի դիմաց վճարումները ժամանակին կատարվեն:

Նախարարի խոսքով՝ անցյալ տարի Տավուշի մարզում արտադրվել է շուրջ 15 հազար տոննա խաղող, որից մթերվել է 7 500-ը, այս տարի բերքն ավելի առատ է, կան տարածքներ, որտեղ հեկտարից մինչև 25 տոննա խաղող են ստանալու:
Սերգո Կարապետյանը կոչ է արել բնակիչներին բերքահավաքի հարցում չշտապել, քանի որ խաղողի շաքարայնությունը դեռևս այնքան էլ բարձր չէ՝ ևս մեկ անգամ վստահեցնելով, որ բոլոր վերամշակող ընկերությունների հետ հստակ պայմանավորվածություն ունեն՝ բերքն ամբողջությամբ կմթերվի, և դաշտում խաղող չի մնա:

Անդրադառնալով վճարումների հարցին՝ նախարարը մասնավորապես նշել է, որ Երևանի կոնյակի գործարանի մասնաճյուղը վճարումները կատարում է եռօրյա ժամկետում, մնացած ընկերությունները՝ ըստ սահմանված գրաֆիկի: