Ձեր վստահելի աղբյուրը

Ֆրանսիայի մայրաքաղաքում անշլագով են անցել ֆրանսահայ հայտնի շանսոնյե Շառլ Ազնավուրի հինգ համերգային երեկոները: Փարիզի համար Ֆրանսիայի ամենահայտնի շանսոնյեն ընտրել էր իր «ոսկե ընտրանին»՝  մի ամբողջ դարաշրջանի լավագույն երգերը: Այս մասին գրում է ՏԱՍՍ-ը:

Հինգ երեկոների մարաթոնն, որն ավարտվել է նախօերին, հավաքել էր ֆրանսիական թիվ մեկ արտիստի հազարավոր երկրպագուներին: Թվում էր, թե ծափահարությունները երբեք չեն մարի Փարիզի «Պալե դե սպոր» պալատում երեկվա երեկոյի ընթացքում:

Ֆրանսիայի ամենախիստ երաժշտական քննադատները «իսկական տրիումֆ» են  անվանել Ազնավուրի այս փառատոնը: Համաշխարհային աստղերից շատերն են կատարել շանսոնյեի ստեղծագործությունները, բայց, ինչպես ցույց են տվել փարիզյան այս համերգները, ոչ ոք չի կարող այնպես կատարել նրա երգերը, ինչպես ինքը հեղինակը:

Ժամանակին չենթարկվող երգիչը («91 գարուն»՝ ինչպես նշել է երգիչը)  երկու ժամանոց համերգն անցկացրել է առանց ընդմիջման և առանց մի կում ջուր խմելու:

«Շառլ Ազնավուրն միշտ աշխատում է: Մաեստրոն դադարներ չի սիրում»,-ասել է արտիստի մամուլի քարտուղար Քրիստինե Սարգսյանը:

Սեպտեմբերի 27-ին նա նվեր է անելու փարիզեցիներին՝ ցերեկային համերգ տալով Palais des sports-ում:

Ըստ աղբյուրի, առաջիկա ամիսներին Շառլ Ազնավուրը ծրագրավորում է համերգներով հանդես գալ Երևանում, Լոնդոնում, իսկ հաջորդ տարի նախատեսված է «նոր հանդիպում ռուս հանդիսատեսի հետ»: