Ձեր վստահելի աղբյուրը

Ա. Բաբաջանյանի անվան համերգասրահում սեպտեմբերի 27-ին տեղի կունենա «Հարատևում» խորագիրը կրող գրական երաժշտական երեկո՝ նվիրված Հայոց ցեղասպանության 100-րդ տարելիցին։ Միջոցառման կազմակերպիչն է «Գթություն պատերազմից և աղետներից տուժածների պահպանման Գոհար» հասարակական կազմակերպությունը (հիմնադիր նախագահ՝ Գագիկ Խալաթյան)։ Ծրագիրն իրականացվում է ՀՀ մշակույթի նախարարության աջակցությամբ։

Panorama.am-ի հետ զրույցում Գագիկ Խալաթյանն ասաց, որ համերգին ելույթ է ունենալու դասական երգիչ Ալեքսանդր Ժույկովը, երգիչ, երգահան Դավիթ Ամալյանը, հեղինակ կատարող Արամ Գյուրջյանը, «Կարին» ավանդական երգի և պարի համույթը:

«Մեր կազմակերպությունը բազմիցս է նման համերգներ կազմակերպել: Հաշվի առնելով, որ այս տարի նշվում է Հայոց ցեղասպանության 100-րդ տարելիցը, մենք նույնպես ցանկացանք միջոցառում կազմակերպել այդ կապակցությամբ, քանի որ նման միջոցառումների միջոցով պետք է աշխարհին, առավել ևս մեր հարևան Թուրքիային հիշեցնենք, որ հայ ազգը երբեք չի դադարելու խոսել Հայոց ցեղասպանության մասին»,- ասաց Գ. Խալաթյանը:

Նա նշեց, որ ցանկանում են այս միջոցառումը մի քանի համերգով կազմակերպել Ֆրանսիայի մի քանի քաղաքում, սպասում են Ֆրանսիայի դեսպանատան թույլտվությանը:

Ալեքսանդր Ժույկովը մեզ հետ զրույցում ասաց, որ արդեն տասը տարի է համագործակցում է «Գթություն պատերազմից և աղետներից տուժածների պահպանման Գոհար» հասարակական կազմակերպության հետ, մասնակցում ՀԿ-ի կողմից կազմակերպված համերգներին. «Միշտ կանգնած եմ Գագիկ Խալաթյանի կողքին»:

Խոսելով ՀԿ-ի գործունեության մասին, Գ. Խալաթյանն ասաց, որ իրենք բավականին ծրագրեր են իրագործել, բարեգործական համերգներ կազմակերպել, ունեցել են նաև «Առաջին գիծ» ֆիլմաշարը:

«Տարիուկես եթեր է հեռարձակվել: Ժամանակի ընթացքում սկսեցինք ֆիլմաշարին կցել նաև «Ճակատագրեր» անվանումը: Այն Արցախյան պատերազմի մասին է, Արցախյան պատերազմի մասնակիցների մասին է, մեր զոհված տղաների մասին է: Ֆիլմաշարը համարում եմ չավարտված, կարելի է շարունակել, քանի որ ունենք ազատամարտիկներ, ճակատագրեր, որոնց պետք է մեր հանրությունն ավելի լավ իմանա, թե ինչպիսի կռվող տղաներ ենք ունեցել: Շատ ազատամարտիկներ առավելագույնն արեցին պատերազմի ժամանակ: Շատերի անուն կարող եմ նշել, ովքեր այդ ճանապարհին շատ մեծ գործ արեցին: Շատերի անունը կարող եմ նշել, բայց որոնց մեր հասարակությունը չի ճանաչում: Դրա վառ ապացույցն է Եռաբլուրը. այդ տղաների մասին գրեթե չի խոսվում, բայց նրանք իրենց կյանքը զոհել են հանուն հայրենիքի: Կցանկանայի նաև, որ նրանց հետ մեր ջարդերի ժամանակ կռված ֆիդայինների մասին պատմեր այդ ֆիլմաշարը, քանի որ այն ժամանակվա կռվողը, Արցախում կռվողը պայքարում էին մեր հողերի ազատագրման համար»:

Գագիկ Խալաթյանը Արցախյան պատերազմի մասնակից է: 1992 թվականի կեսերից առողջական խնդիրների պատճառով չի կարողացել շարունակել իր պայքարը: Սակայն նա շարունակել և շարունակում է իր պայքարը մարտի դաշտից դուրս. «Ինչով կարողանում եմ օգնում եմ իմ ժողովրդին, մարտական ընկերներին: Ինձ համար ցավալի է, որ իմ մարտական ընկերներից մի քանիսը նյութապես անապահով վիճակում են: Միասին աշխատում ենք ելքեր գտնել: Բայց այնքանով եմ ուրախ, որ երբեք չեն ընկճվում, տխրում: Ինչպես մարտի դաշտում էին հզոր, հաղթական տրամադրությամբ, այնպես էլ հիմա են: Երբ նրանց տեսնում եմ առույգ, ժիր, ինձ այսօրվա վիճակում մեծ էներգիա, զորություն են տալիս»:

Գագիկ Խալաթյանը վստահ է, որ միայն միասին, միասնաբար կարելի է հասնել հաջողության, ունեցածը պահել ու էլ ավելի հզորացնել:

«Արցախյան ազատամարտը սկիզբն է մեր հայկական հողերի, պատմությունը վերականգնելու ուղղությամբ: Մեր ժողովուրդն այսօրվա իրականության մեջ պետք է ուժ գտնի իր մեջ ու հիշի անցյալը, անցյալի հետ կապված կերտի ապագան: Ունենք անկախ երկիր, սակայն միայն պետության խնդիրը չէ պահպանել մեր ունեցածը: Ժողովուրդը պետք է աջակցի: Ինչպես Արցախյան պատերազմում, դրանից առաջ էլ Սարդարապատի ճակատամարտում և այլ ծանր պահերին, մենք հասել ենք հաղթանակի միասնական լինելու արդյունքում: Բոլորս միասին պետք է լինենք, տարանջատում չպետք է լինի»,-ասաց Արցախյան պատերազմի մասնակից, «Գթություն պատերազմից և աղետներից տուժածների պահպանման Գոհար» հասարակական կազմակերպության հիմնադիր նախագահ Գագիկ Խալաթյանը: