Ձեր վստահելի աղբյուրը

Կոմպոզիտոր, երգիչ Վահան Արծրունու բեմական գործունեության 30-ամյակին և ծննդյան 50-րդ տարեդարձին ընդառաջ կազմակերպվելու է հոբելյանական համերգաշար: Այն ներառելու է հինգ բազմաբնույթ համերգային ծրագրեր, որոնք ներկայացնելու են ստեղծագործող և կատարող Վահան Արծրունու որդեգրած համերգային ժանրերն ու նախընտրած երաժշտական ուղղությունները։ Այս մասին տեղեկանում ենք միջոցառման ֆեյսբուքյան էջից: 

Համերգաշարի մեկնարկեը տրվելու է հոկտեմբերի 11-ին Կամերային երաժշտության տանը կամերային երաժշտության համերգով՝ «Կոմիտաս. Տասը Հայտնություն»՝ Կոմիտասի բանաստեղծությունների հիման վրա գրված երգաշար: Մասնակցելու է Հայաստանի պետական կամերային նվագախումբը (գեղարվեստական ղեկավար և գլխավոր դիրիժոր՝ Վահան Մարտիրոսյան): 

Հոկտեմբերի 28-ին Ա. Բաբաջանյան  համերգասրահում հնչելու է Ռազմիկ Դավոյանի և Վահան Արծրունու բանաստեղծությունների հիման վրա գրված երգեր՝ ռոք խմբի և  InRock Quintet-ի մասնակցությամբ:j

Նոյեմբերի 9-ին Հ. Թումանյանի անվան տիկնիկային թատրոնի բեմում կայանալու է պրոգրեսիվ երաժշտության համերգ ռոք խմբի մասնակցությամբ, նոյեմբերի 30-ին նույն վայրում՝ ակուստիկ ռոք երաժշտության համերգ ռոք խմբի  և InRock Quintet-ի մասնակցությամբ:

Դեկտեմբերի 25-ին Ա.Խաչատրյանի անվան  համերգասրահում տեղի է ունենալու գալա համերգը՝ Հայաստանի ազգային ֆիլհարոմոնիկ նվագախմբի հրավերով և մասնակցությամբ (գեղարվեստական ղեկավար և գլխավոր դիրիժոր՝ Էդուարդ Թոփչյան): 

Համերգաշարն անցկացվելու է ՀՀ նախագահի տիկին Ռիտա Սարգսյանի բարձր հովանու ներքո։

Վահան Արծրունին ծնվել է 1965 թ. դեկտեմբերի 5-ին Երևանում: 1983-91թթ սովորել է Երևանի Մ.Հերացու անվան պետական բժշկական ինստիտուտում: 1986-92թթ եղել է «Նարեկ» արական երգչախմբի մեներգիչ, 1993-94թթ` «Հայսմավուրք» երգչախմբի արտիստ: 1989-94թթ սովորել է Երևանի Կոմիտասի անվան պետական կոնսերվատորիայում: 1995թ. եղել է Հայաստանի պետական կապելլայի արտիստ: 1994-96թթ հեղինակել և կազմակերպել է «Գուադեմաուս» 4 երաժշտական փառատոները:

Ստեղծագործում է երաժշտության բազմաթիվ ոլորտներում (կամերային երաժշտությունից մինչև ռոք, էլեկտրոնայինից` սիմֆոնիկ և երգչախմբային երաժշտություն), հանդես է գալիս տարբեր համերգային ծրագրերով Հայաստանում և արտասահմանում, գրում երաժշտություն կինոյի, թատրոնի և ակտուալ արվեստի ցուցադրությունների համար։

Վահան Արծրունին հայտնի է է նաև կինոյի, անիմացիոն շարժանկարի, թատրոնի և ակտուալ արվեստի բնագավառներում` հեղինակ է 12 վավերագրական ֆիլմերի, 5 անիմացիոն ֆիլմերի, մնջախաղի թատրոնի («Գիրք ծաղկանց»), բալետի («Ներդուրս») և բազմաթիվ ակտուալ արվեստի ակցիաների (Քիմիական անձրև, Չսերտաց դասեր, SIMULACRUM) համար գրված երաժշտությամբ։