Քաղաքական պատճառներով են ծեծել Սմբատին. Պետրոսյանը արձագանքում է Շարմազանովին
«Շարմազանովը երևի արդեն գիտի` ինչ է պատահել, որ նման հայտարարություններ է անում: Դե թող ինքն էլ ասի` ինչ պատճառով է եղել Սմբատ Հակոբյանի ծեծը»,-Panorama.am-ի թղթակցի հետ զրույցում հայտարարեց «Ազատամարտիկների դաշինքի» անդամ Ռազմիկ Պետրոսյանը` մեկնաբանելով ԱԺ փոխնախագահ, Հանրապետական կուսակցության անդամ Էդուարդ Շարմազանովի հայտարարությունները:
Հիշեցնենք` պատգամավորը սեպտեմբերի 24-ին ՀՀԿ ԳՄ նիստից հետո հայտարարել էր, որ ազատամարտիկ Սմբատ Հակոբյանին ծեծելու հիմքում քաղաքական ենթատեքստ չկա: «Որևէ քաղաքական պատվեր չի եղել ու այդ հարցին փորձել քաղաքական երանգ տալ, իրականությունից հազարավոր կիլոմետրերով հեռու է: Որևէ քաղաքական երանգ տեսնել այդ խնդրում անընդունելի է և չկա, մնացածը նախաքննությունը կպարզի», -ասել էր նա:
Պետրոսյանն ասաց, որ Սմբատ Հակոբյանը անձնական թշնամանք չունի որևէ մեկի հետ, ոչ էլ «որևէ մեկին վատություն է արել»:
«Ես գիտեմ, որ քաղաքական պատճառներով են ծեծել Սմբատին: Բայց եթե ինքը նման հայտարարություն է անում, ուրեմն հստակ բան գիտի, թող ինքն էլ պատասխանի»,- հավելեց Պետրոսյանը:
Ազատամարտիկի խոսքով, Սմբատ Հակոբյանի քաղաքական կեցվածքն արդեն պատճառ է, որ նրան ծեծի ենթարկեն. «Համոզելով, խնդրելով, ծեծելով փորձում են հեռու պահել պայքարից: Միշտ էդ խնդիրը եղել է: Սա էլ էդ դեպքերից մեկն ա»:
Անդրադառնալոով այն տեղեկություններին, որ Սմբատ Հակոբյանին ծեծելու պատճառը, հավանաբար, գումարային պարտքն է եղել, Պետրոսյանը ասաց. «Ես իմ ընկերոջ հետ խոսել եմ, նա բացառում է որևէ մեկի հետ պարտք ու պահանջի խնդիրը, չի եղել նման բան: Էդ մարդն ասում է` որևէ մեկին պարտք չի»:
Ինչ վերաբերում է Կենտրոն և Նորք Մարաշ վարչական շրջանների ընդհանուր իրավասության դատարանի որոշմանը, որի համաձայն, կալանավորվել են ազատամարտիկին ծեծելու համար կասկածվող երեք անձանցից միայն երկուսը, իսկ մյուսը գրավով ազատ է արձակվել, Պետրոսյանն ասաց, որ իրավական հարցերի վերաբերյալ ինքը որևէ մեկնաբանություն չի կարող անել:
Նշենք, որ Երևանի բնակիչներ Հ. Պետրոսյանին, Ա. Սարգսյանին և Ա. Գրիգորյանին սեպտեմբերի 26-ին մեղադրանք էր առաջադրվել՝ մի խումբ անձանց կազմում, դիտավորությամբ Սմբատ Հակոբյանին ծանր մարմնական վնաս պատճառելու համար՝ ՀՀ քրեական օրենսգրքի 112-րդ հոդվածի 2-րդ մասի 6-րդ կետով։ Քննիչը միջնորդություն էր ներկակյացրել դատարան բոլոր 3 կասկածվողների նկատմամբ որպես խափանման միջոց ընտրել կալանքը, բայց դատարանը այդ միջնորդությունը բավարարել էր մասնակի` որոշելովկալանավորել նրանցից երկուսին: Հ. Պետրոսյանը գրավի դիմաց ազատ է արձակվել:
Թեմային առնչվող հրապարակումներ`
3 անձի մեղադրանք է առաջադրվել՝ ազատամարտիկ Սմբատ Հակոբյանին ծանր մարմնական վնաս պատճառելու համար
Կարեն Անդրեասյանը՝ ազատամարտիկին ծեծի ենթարկելու մասին
Ազատամարտիկին ծեծելու քաղաքական պատվեր չկա և չի եղել. Շարմազանով
Հայտնի է ազատամարտիկին ծեծելու կասկածանքով ձերբակալվածների ինքնությունը
Հարուցվել է քրգործ և Սմբատ Հակոբյան ճանաչվել է տուժող
Հիվանդանոց տեղափոխված ազատամարտիկի վիճակը կայուն է
Ազատամարտիկին ծեծելու համար կասկածվող 3 անձանցից 2-ը կալանավորվել են
Լրահոս
Տեսանյութեր
Օր չկա, որ մենք փողոցում չտեսնենք բողոքի դուրս եկած տարբեր խմբեր. Բագրատ Սրբազան
