Ձեր վստահելի աղբյուրը

Երիտասարդական նվագախումբը՝ Սերգեյ Սմբատյանի ղեկավարությամբ, երկու համերգով հանդես է եկել աշխարհահռչակ ջութակահար Արա Մալիկյանի հետ, ով առաջադրվել է լատինամերիկյան Գրեմմի մրցանակի։

Սեպտեմբերի 25-ի ելույթը կայացել է իսպանական Սարագոսայի «Մոցարտ» համերգասրահում, իսկ սեպտեմբերի 26-ի համերգը՝ Մադրիդի Թագավորական թատրոնում։

Հայաստանի պետական երիտասարդական նվագախմբի հասարակայնության հետ կապերի բաժնից հայտնում են, որ
հնչել են Խաչատրյանի, Մենդելսոնի, Պագանինիի, Չայկովսկու և այլ կոմպոզիտորների ստեղծագործությունները, կատարումներ «Լեդ Զեփելինի» ռեպերտուարից։ Երաժիշտները կատարել են Արա Մալիկյանի «1915» ստեղծագործությունը՝ նվիրված Հայոց ցեղասպանության զոհերի հիշատակին։ Ընդ որում, «1915» գործը գրված էր հենց այս համերգների համար։

Արա Մալիկյանը ծնվել է Բեյրութում, ուսանել է Լոնդոնում, այժմ բնակվում է Մադրիդում։ Նա վիրտուոզ ջութակահար է՝ վառ արտահայտչականությամբ։ Թողարկել է մի քանի տասնյակ ձայնասկավառակ։ Նրա ջութակը երաժշտական աշխարհում ամենաօրիգինալ և նորարարական ձայներից է։ Մալիկյանը հեղինակավոր միջազգային մրցույթների դափնեկիր է, տարեկան ունենում է ավելի քան 450 համերգ աշխարհի մոտ 40 երկրում:

Սերգեյ Սմբատյանը նշել է, որ 2016-ին փորձելու են հրավիրել Արա Մալիկյանին Հայաստան, քանի որ նա հայ ժողովրդի հերոսներից է։

«Մենք միշտ հայերի ենք փնտրում այլ ազգերի մեջ, բայց մոռանում ենք, որ ունենք իրական հայ հերոսներ, ովքեր աշխարհում մտածելակերպ են փոխում, ձևավորում հայ մարդու կերպարը Հայաստանի սահմաններից դուրս»,- ասել է Երիտասարդական նվագախմբի գլխավոր դիրիժորը։