Ձեր վստահելի աղբյուրը

Սյունիքի մարզպետ Սուրիկ Խաչատրյանի որդու` Տիգրան Խաչատրյանի պաշտպանությունն իրականացնող փաստաբան Արմեն Մելքոնյանը վերաքննիչ բողոք է ներկայացրել` պահանջելով վերանայել իր պաշտպանյալի նկատմամբ մեղադրանք առաջադրելու և նրան կալանավորելու մասին որոշումները: Այդ մասին Panorama.am-ին տեղեկացրեց փաստաբան Մելքոնյանը: Բացի այդ, նրա խոսքով, նույնաբովանդակ նամակ էլ ուղարկվել է ՀՀ Գլխավոր դատախազություն:

«Մենք նաև դատախազությանը միջնորդություն ենք ներկայացրել, որպեսզի Տիգրան Խաչատրյանի մասով քրեական գործը կարճվի», -հավելեց պաշտպանը:

Մելքոնյանը սակայն, չպատասխանեց հարցին, թե ինչ հիմնավորմամբ պետք է Խաչատրյանի վերաբերյալ քրեական գործը կարճվի:

«Այդ հարցին հիմա չեմ կարող պատասխանել, այս պահին նպատակահարմար չեմ գտնում մանրամասներ հայտնել, մի քիչ համբերեք, կտեսնեք` ինչը ոնց է լինում»,-հավելեց Մելքոնյանը:

Նշենք, որ փաստաբանը հայտարարել էր, որ այս գործով տուժող Զաքարյան եղբայրներից մեկը իր տված ցուցմունքից հրաժարվել է: Սակայն ավելի ուշ Զաքարյանները հայտարարեցին, թե իրենք նման բան չեն արել, ավելին, Հարություն Զաքարյանը Մոսկվայում բուժում է ստանում, հետևաբար չէր կարող քննչական որևէ գործողության մասնակցել, փոխել ցուցմունքը:

Այս առնչությամբ մեր հարցին ի պատասխան, Մելքոնյանը նկատեց. «Մի քիչ համբերեք և կտեսնեք, թե ում հայտարարություններն են ճիշտ: Կարծում եմ, որ այս անգամ արդարությունը պետք է հաղթի»:

Տիգրան Խաչատրյանը Գորիսի Սդղի գյոլ կոչվող տարածքում մայիսի 2-ին տեղի ունեցած վիճաբանության մասնակիցներից մեկն է. նա, ըստ պաշտոնական տեղեկատվության, բռնություն է գործադրել Հարություն Զաքարյանի նկատմամբ` վերջինիս առողջությանը պատճառելով ծանր մարմնական վնաս: Տիգրան Խաչատրյանը կալանավորվել էր հուլիսի 27-ին:

Նրան մեղադրանք էր առաջադրվել ՀՀ քրեական օրենսգրքի 112-րդ հոդվածի 1-ին մասով` «դիտավորությամբ մեկ ուրիշին մարմնական վնասվածք պատճառելը կամ առողջությանն այլ ծանր վնաս պատճառելը, որը վտանգավոր է կյանքի համար կամ առաջացրել է տեսողության, խոսքի, լսողության կամ որևէ օրգանի կամ օրգանի ֆունկցիայի կորուստ կամ արտահայտվել է դեմքի անջնջելի այլանդակմամբ, ինչպես նաև կյանքի համար վտանգավոր այլ վնաս է պատճառել»: Հարություն Զաքարյանն ունի տեսողության կորուստ և բազմակի անգամ ենթարկվել է վիրահատության:

Նշենք, որ այս գործի շրջանակներում ընդհանուր առմամբ մեղադրանք էր առաջադրվել 7 անձի, որոնցից մեկը Սուրիկ Խաչատյանի որդին է, եղբայրն ու նրա որդին, իսկ մյուսները այս կամ այն կերպ առնչություն ունեն Խաչատրյան ընտանիքի հետ:

Թեմային առնչվող հրապարակումներ`
ՊՆ-ն հաստատում է Սուրիկ Խաչատրյանի որդու նևրասթենիան
Փաստաբանի՝ Տիգրան Խաչատրյանի «ապօրինի կալանավորման» տարբերակը
Տիգրան Խաչատրյանը իրականության զոհն է. Փաստաբանը մանրամասներ է ներկայացրել
Սուրիկ Խաչատրյանի որդուն կալանավորելու միջնորդություն է ներկայացվել դատարան
Զաքարյանները պնդում են, որ Սուրիկ Խաչատրյանի եղբոր մեղադրանքը պետք է խստացվի
Սուրիկ Խաչատրյանի որդին ձերբակալվել է (լրացված)