Վարչապետը մասնակցել է Օլիմպիական ավանի բացմանը (լուսանկարներ)

Հասարակություն 16:44 29/09/2015

Վարչապետը մասնակցել է Օլիմպիական ավանի բացմանը (լուսանկարներ)

Վարչապետ Հովիկ Աբրահամյանը Երևանում մասնակցել է Օլիմպիական ավանի բացմանը, որին ներկա են եղել Ազգային օլիմպիական կոմիտեների ասոցիացիայի նախագահ շեյխ Ահմադ Ալ-Ֆահադ Ալ-Սաբահը, Եվրոպայի օլիմպիական կոմիտեի նախագահ Պատրիկ Հիկեն, Հայաստանի ազգային օլիմպիական կոմիտեի (ՀԱՕԿ) նախագահ Գագիկ Ծառուկյանը, պաշտոնատար անձինք, մարզաշխարհի ներկայացուցիչներ, հյուրեր: Այս մասին հայտնում են կառավարության տեղեկատվության և հասարակայնության հետ կապերի վարչությունից:

Կառավարության ղեկավարը շրջել է ավանով, ծանոթացել շուրջ 7500 քմ. մակերեսի վրա ավելի քան 300 մարզիկի համար նախատեսված մարզաբազայում ստեղծված պայմաններին: Մարզաբազայում շրջայցի ժամանակ ներկայացվել են ըմբշամարտի, ձյուդոյի, թեքվանդոյի, բռնցքամարտի, ծանրամարտի և խաղային մարզաձևերի մարզադահլիճներն ու դրանց հնարավորությունները, սպորտային բժշկության և հակադոպինգային ծառայության կենտրոնները: Օլիմպիական ավանի միջազգային չափորոշիչներին համապատասխանող հավաքական թիմերի կենտրոնում գործելու են մենապայքարային, ուժային, խաղային, ինչպես նաև ջրային մարզաձևերի դահլիճներ, իսկ հյուրանոցային մասնաշենքը նախատեսված է 320 մարզիկի համար: Մասնագիտացված մարզադահլիճներից բացի, մարզաբազայում գործելու են նաև լողավազան, բացօթյա մարզահրապարակներ և խաղահրապարակներ: Օլիմպիական ավանը կունենա մարզումների համար անհրաժեշտ բոլոր պայմանները:

Այնուհետև, վարչապետի մասնակցությամբ շրջանառության մեջ է դրվել նաև ՀԱՕԿ-ի 25-ամյակին նվիրված նամականիշ:
Նախատեսվում է, որ Օլիմպիական ավան կտեղափոխվի Հայաստանի ազգային օլիմպիական կոմիտեի աշխատակազմը: Ավանի շինարարությունը սկսվել էր 2013 թվականից:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: