Ձեր վստահելի աղբյուրը

««Կինոյի մասին» ՀՀ օրենքի նախագիծը մշակվել է ու ներկայացվել կառավարություն: Կառավարությունն այն ուղարկել է համապատասխան գերատեսչություններ՝ իրենց կարծիքն արտահայտելու, առաջարկություններով հանդես գալու համար: Ըստ երևույթին, Ազգային ժողովի աշնանային նստաշրջանի ընթացքում այն կհաստատվի»: Լրագրողների հետ զրույցում ասաց Հայաստանի Ազգային կինոկենտրոնի տնօրեն Գևորգ Գևորգյանը:

Հիշեցնենք, որ ի կատարումն Հայաստանի նախագահի հանձնարարականի` «Կինոյի մասին» ՀՀ օրենքի նախագծի մշակման վերաբերյալ, ՀՀ մշակույթի նախարարի հրամանով ստեղծվել է մասնագիտական հանձնաժողով: Հանձնաժողովում ընդգրկված են ոլորտի առաջատար մասնագետները:

Գ. Գևորգյանի գնահատմամբ, նախագծում շատ լավ կետեր կան, որոնք նպաստելու են կինոյի կյանքը թեթևացնելուն, հեշտացնելուն՝ մաքսային և հարկային արտոնություններ, կինոարտադրության, հետարտադրության գործընթացների հետ կապված դրույթներ. «Պետք է հնարավորություն ընձեռվի ազգային ֆիլմերը հասցնել հայ հանդիսատեսին: Անկախ կոմերցիոն են, թե ոչ, եթե կինոթատրոնը չի ցանկանում ցուցադրել, քանի որ եկամուտ չի բերում իրեն, պետությունը պետք է ֆինանսավորի կինոթատրոնին, որպեսզի ցուցադրի, նաև ստիպի հեռուստաընկերություններին»:

Գ. Գևորգյանի կարծիքով, գերատեսչությունները որոշ կետերի վերաբերյալ կունենան իրենց առարկությունները, առաջարկությունները:

«Դեռ պետք է վիճենք, բանավիճենք, մինչև հասնենք նախագծի ընդունմանը: Այս ամեն ինչում լավ բան կա, որ նախագահի հանձնարարականն էր «Կինոյի մասին» օրենքի նախագիծ կազմելը: Նախագահը շահագրգիռ է, որ նման օրենք ընդունվի: Դա շատ լավ է, որպեսզի ամեն ինչ ավելի արագ լինի»,- ասաց Ազգային կինոկենտրոնի տնօրենը:

Նախորդող հապարակում՝
«Կինոյի մասին» օրենքն անհրաժեշտություն է. «Մշակույթն արժևորված չէ»