Ձեր վստահելի աղբյուրը

ՀՀ էկոնոմիկայի նախարար Կարեն Ճշմարիտյանն այսօր կառավարության նիստից հետո լրագրողների հետ զրույցում պատասխանելով հարցին, թե այն ընտանիքները, որոնք ամսական կսպառեն 250 կվ-ից ավելի էլեկտրաէներգիա, արդյոք կառավարությունը օգոստոսի 1-ին հաստատված սակագնի տարբերությունը չի սուբսիդավորի, նախարարը նշեց, որ էլեկտրաէներգիայի սակագնի սուբսիդավորման մանրամասներին չի տիրապետում, բայց ընդհանուր առմամբ՝ այդպես է հասկանալի:

Նախարարը, բերելով իր ընտանիքի օրինակը, ասաց, որ իրենք ավելին են սպառում, քան նշված թիվն է: «Ես ընդհանրապես փոխհատուցումներին, սուբսիդիաներին այդքան էլ կողմ չեմ, բայց այստեղ սոցիալական խնդիր կա, հատկապես որ փոքր ձեռնարկություններն էին ընկնում դրա մեջ»:

Դիտարկմանը, թե նախարարը չի՞ կարծում, որ ավելի կարևոր է սակագնի արդարացի լինելը, քան սուբսիդավորումը, Կ.Ճշմարիտյանն ասաց, որ ինքը կասկածի տակ չի առնում «Դելոյթ ընդ Տուշ» խորհրդատվական ընկերության եզրակացությունը, որը հիմնավոր է համարել օգոստոսի 1-ից հաստատված էլեկտրաէներգիայի սակագինը:

«Ես արդեն կասկածի չէի ենթարկի, քանի որ այս ընկերությունը աշխարհի 4 այն ընկերութուններից է, որոնք մասնագիտորեն են մոտենում հարցին: Ընդհանրապես խորհուրդ կտայի հավատալ, քանի որ նրանք բարձր մասնագիտական կարողություններ ունեն»,-ասաց նա: