Ձեր վստահելի աղբյուրը

Թուրքիայի նախագահ Ռեջեփ Թայիփ Էրդողանը հայտարարել է, որ կխնդրի Ռուսաստանին վերանայել Սիրիայում «Իսլամական պետության» դիրքերին  ավիահարվածներ հասցնելու ռազմավարությունը, քանի որ իր տեղեկություններով Ռուսաստանը հարվածում է նաև սիրիական ընդդիմության դիրքերին: Հաղորդում է «Ռիա նովոստի» լրատվական գործակալությունը:

Աղբյուրի փոխանցմամբ` իր մտահոգությունների մասին Թուրքիայի նախագահը պատրաստվում է բարձրաձայնել Վլադիմիր Պուտինի հետ հանդիպման ժամանակ:

«Ես անպայման հանդիպելու եմ Պուտինի հետ, որպեսզի քննարկեմ Սիրիայում տիրող իրավիճակն ու իմ մտահոգությունները հայտնեմ այդ ամենի հետ կապված: Որքանով մեր երկրները միմյանց համարում են ընկերական երկրներ, ես կխնդրեմ, որ նա վերանայի Ռուսաստանի գործողությունները Սիրիայում»,- նշել է Էրդողանը:

Տեղեկացվում է, որ Էրդողանը հայտնել է, թե ինքը տեղեկություններ ունի, որ Ռուսաստանը հարվածներ է հասցնում նաև սիրիական չափավոր ընդդիմությանը:

Նշվում է, որ Էրդողանը չի բացահայտել իր այդ տեղեկատվության աղբյուրը: