Ձեր վստահելի աղբյուրը

2015 թվականը Հայաստանի տնտեսության համար հաջող տարի չէր: Այս մասին այսօր լրագրողների հետ հանդիպման ժամանակ ասաց Հայրենական ապրանք արտադրողների միության նախագահ Վազգեն Սաֆարյանը:

Նրա խոսքերով՝ դա պայմանավորված է Ռուսաստանի դեմ կիրառված պատժամիջոցներով, նավթի գների անկմամբ և ռուսական ռուբլու արժեզրկմամբ: Արդյունքում, ըստ նրա, հայ արտադրողները չկարողացան ապրանքներ արտահանել Ռուսաստան և ստիպված եղան սպասել այնքան, որպեսզի ռուբլին արժևորվի:

«Սակայն ռուբլին այդպես էլ չարժևորվեց և կարել է ասել, որ մենք այսօր Ռուսաստան ապրանք չենք արտահանում, հիմնականում վերջին շրջանում արտահանվում են գյուղատնտեսական մթերքներ: Դրա համար էլ մեր տնտեսությունն այսօր հայտնվել է այս վիճակում»,- ասաց Վ.Սաֆարյանը:

Ինչ վերաբերում է Հայաստանի արտաքին առևտրաշրջանառությանը, ապա 2015-ի հունվար-օգոստոսին նախորդ տարվա հունվար-օգոստոսի համեմատ արտահանումը փոքր` 0,5 տոկոս աճ է ունեցել, իսկ ներմուծումը նվազել է 26,3 տոկոսով:

«Մի կողմից լավ է, որ ներմուծումը նվազել է, քանի որ կարողանում ենք խնայել տարադրամի արտահոսքը, բայց մյուս կողմից սա խոսում է այն մասին, որ գնողունակությունն է նվազել: Այսինքն՝ մարդիկ սկսել են ավելի քիչ ապրանք գնել: Դրա վկայությունը Ազգային վիճակագրական ծառայության հրապարակած տվյալներն են, որոնց համաձայն առևտուրը ութ ամիսներին կազմել է 94-95 տոկոս»,- ասաց Վ.Սաֆարյանը՝ հավելելով, որ դա նաև պայմանավորված է տրանսֆերտների, մասնավորապես, Ռուսաստանից ստացվող տրանսֆերտների նվազմամբ:

Ըստ նրա՝ եթե նախկինում մեկ ընտանիքը Ռուսաստանից ստանում էր ամսական 30-35 հազար ռուբլի, որը կազմում էր մոտ 1000 դոլար, ապա այսօր էլ ստանում են նույնքան գումար, սակայն դա կազմում է մոտ 500 դոլար:

Խոսելով տնտեսական ակտիվությունից, Վ.Սաֆարյանը նշեց, որ ԱՎԾ-ի տվյալներով Հայաստանի տնտեսական ակտիվության ցուցանիշը (ՏԱՑ) հունվար-օգոստոսին նախորդ տարվա նույն ժամանակահատվածի համեմատ աճել է 3,9 տոկոսով, ինչը, ըստ նրա, վատ ցուցանիշ չէ:

«Բայց եթե նայում ենք նրա բաղադրիչներին, ապա այդ ցուցանիշը մտահոգիչ է, քանի որ ունենք արդյունաբերական ապրանքների ընդամենը 4,4%-ի աճ, միայն գյուղատնտեսության արտադրանքի ծավալներն են 8 ամիսներին աճել 13,5 տոկոսով, սակայն այստեղ էլ առաջացել են խնդիրներ՝ կապված խաղողի մթերման հետ»,- ընդգծեց Վ.Սաֆարյանը:

Նրա խոսքերով, որպեսզի ընկերությունները խաղող մթերեն, դրա համար պետք է վարկ վերցնեն: Սակայն Վ.Սաֆարյանը գտնում է, որ ՀՀ կառավարությունը այս հարցում պետք է աջակցի մթերող ընկերություններին:

«Թեև կառավարությունն այդ վարկերը որոշ չափով սուբսիդավորում է, բայց պետք է այնպես կազմակերպի ամբողջ գործընթացը, որպեսզի ոչ գյուղացին, ոչ էլ մթերողները չտուժեն»,- ասաց նա:

Վ.Սաֆարյանը նշեց, որ կառավարությունը պետք է կառուցվածքային փոփոխությունների ճանապարհով գնա: Մասնավորապես, ըստ նրա, պետք է ստեղծվի արդյունաբերության և արտաքին առևտրի նախարարություն: Եթե նման նախարարություն լիներ, ապա տնտեսագետը գտնում է, որ այդ նախարարությունը պետություն-մասնավոր գործընկերության գործառույթները իրականացնելիս կկարողանար արդյունաբերության համար միջոցներ հայթայթեր արտաքին առևտրից առաջացած շահույթներով և դրանք կներդներ արդյունաբերության մեջ: