Ձեր վստահելի աղբյուրը

Հայաստանում սահմանադրության բարեփոխումը դրական է գնահատվել Վենետիկի հանձնաժողովի անդամների ու զեկուցողների կողմից, ովքեր աշխատել են բարեփոխումների հատուկ հանձնաժողովի հետ: ՀՀ նախագահ Սերժ Սարգսյանի հետ հանդիպումից  հետո լրագրողների հետ ճեպազրույցում հայտարարեց  «Ժողովրդավարություն՝ իրավունքի միջոցով» եվրոպական հանձնաժողովի (Վենետիկի հանձնաժողով) նախագահ Ջիանի Բուքիքիոն:

Նրա խոսքով, Վենետիկի հանձնաժողովը աշխատել է Հայաստանի հետ սահմանադրական բարեփոխումների շուրջ սկսած 2000թ.-ից:

«Մենք մասնակցել ենք առաջին բարեփոխումներին` 2001թ-ին, ինչպես նաև 2003 և 2004 թվականների հանրաքվեներին: Դրանից հետո այս անգամ մենք նորից ենք սկսել աշխատանքները: Ամեն անգամ որոշ առաջընթաց է գրանցվել, սահմանադրությունն ամեն անգամ բարեփոխվել է»,-ասաց Վենետիկի հանձնաժողովի նախագահը, ապա ավելացրեց.  «Ես շատ լավ եմ հիշում, որ 2004թ.-ին բազմաթիվ քաղաքական կուսակցություններ, հատկապես ընդդիմադիր թևից, ցանկանում էին, որպեսզի լիներ խորհրդարանական համակարգ, բայց այդ ժամանակ հնարավոր չէր փոխել համակարգը և անցում կատարել կիսանախագահականից խորհրդարանականի: Այժմ կա այդ հնարավորությունը, և ի վերջո բոլոր եվրոպական երկրներում սա է միտումը՝ նրանք անցնում են խորհրդարանական համակարգի, որտեղ խորհրդարանն ունի բոլոր լիազորությունները»:

Ջիանի Բուքիքիոյի կարծիքով, այս առումով սա առաջընթաց է:

«Ինչ վերաբերում է սահմանադրության այլ գլուխներին, այստեղ նույնպես բարելավում կա, քանի որ մարդու իրավունքների այն կատալոգը, որն առկա է փոփոխությունների նախագծում, շատ լավն է. այն լիարժեք կերպով համապատասխանում է Մարդու իրավունքների եվրոպական կոնվենցիային: Մեզ համար սա է ամենակարևորը: Մենք այստեղ ենք (ինչպես ես ասացի նախագահին և Հայաստանում իմ գործընկերներին), ո՛չ թե նրա համար, որ ինքներս ստեղծենք սահմանադրության նախագիծ ձեր ժողովրդի համար, այլ միայն նրա համար, որ ստուգենք, թե արդյոք ձեր առաջարկած փաստաթուղթը համապատասխանում է միջազգային չափանիշներին, հատկապես Եվրոպայի խորհրդի արժեքներին, որոնք են` ժողովրդավարությունը, բազմակարծությունը և մարդու իրավունքների պաշտպանությունը, և որ ամենակարևորն է` նախագծի համապատասխանությունը Մարդու իրավունքների եվրոպական կոնվենցիայի հետ: Այս առումով, պետք է կրկնեմ` բարեփոխումների այս նախագիծը ոչ մի խնդիր չունի: Պետք է նաև ասեմ, որ մենք դեռ չենք տեսել վերջնական փաստաթուղթը, քանի որ խորհրդարանում որոշ փոխզիջումներ եղան նախքան հաստատումը, բայց չեմ կարծում, որ այդ փոխզիջումները ամբողջությամբ զրոյացրել են նախկինում արված աշխատանքը»,-ասաց Վենետիկի հանձնաժողովի նախագահը:

 Նախորդիվ՝
Սահմանադրության փոփոխությունների հանրաքվեի օրը հայտնի է