Ձեր վստահելի աղբյուրը

«Այլընտրանք չկա, Սահմանադրության հանրաքվեն պետք է լինի հնարավորինս թափանցիկ, քանի որ մենք գործ ունենք մայր օրենքի հետ, դրան հետևում է միջազգային հանրությունը և հորդորում եմ բոլոր քաղաքական ուժերին, քաղաքացիներին հնարավորինս ակտիվ և թափանցիկ լինեն»,- այսօր ԱԺ ճեպազրույցների ժամանակ ասաց ՀՀԿ խմբակցության ղեկավար Վահրամ Բաղդասարյանը՝ հավելելով, որ իշխանությունն ամեն ինչ պետք է անի, որ հանրաքվեն լինի արդար ու թափանցիկ:

«Բնականաբար, ինչպիսի հանրաքվե էլ անցկացվի, հետագայում կլինեն քննադատություններ, քանի որ ամեն պարտվող, թեև սահմանադրության հանրաքվեի ժամանակ պարտվողներ կամ հաղթողներ չեն լինում, որովհետև խոսքը մայր օրենքին է վերաբերում, բայց արդարացնելու համար իրենց կարծիքը միշտ քննադատում են: ՀՀԿ-ն, իշխանությունը ամեն ինչ անելու է, որպեսզի հանրաքվեն անցնի ամենաբարձր մակարդակով, լինի թափանցիկ և ընկալելի միջազգային հանրության համար»,-նշեց Վահրամ Բաղդասարյանը:

Անդրադառնալով ՕԵԿ-ի և Դաշնակցության հայտարարություններին, թե հաջորդ խորհրդարանական ընտրությունների ժամանակ նրանք ավելի մեծ ներկայացվածություն են ունենալու, ՀՀԿ խմբակցության ղեկավարը նշեց, որ յուրաքանչյուր քաղաքական ուժ, բնականաբար, ձգտում է մեծամասնություն կազմել խորհրդարանում և ողջունում է կուսակցությունների լավատեսությունը, մյուս կուսակցություններին էլ նման լավատեսության կոչ արեց:

Միաժամանակ նշեց, որ ժամանակը ցույց կտա, թե ՀՀԿ-ն ինչպիսի ներկայացվածություն կունենա հաջորդ խորհրդարանում:
Հարցին, թե ո՞ր քաղաքական ուժերի հետ են անցկացնելու Սահմանադրության հանրաքվեի քարոզարշավը, Վահրամ Բաղդասարյանը պատասխանեց, որ այս առնչությամբ քննարկումներ դեռևս չեն անցկացրել։

Դիտարկմանը, թե ՀԱԿ խմբակցության ղեկավար Լևոն Զուրաբյանն ասում է, որ քաղաքական կոնսոլիդացիա կա «ոչ»-ի ճակատում, Վահրամ Բաղդասարյանը պատասխանեց. «Տեսնում եք, ինչ լավ է, որ չեք ասում քաղաքական ուժերն են պնդում, այլ ասում եք, որ պնդում են Լևոնը, Ջհանգիրը, Սասունը: Պետք է պնդեն, բա ի՞նչ պետք է անեն: Ես նորից եմ ասում, առանձին մարդիկ, անհատ քաղաքական գործիչներ, մարդկային խմբեր, բնականաբար, պետք է ինչ-որ ճակատ ձևավորեն: Դուք կարո՞ղ եք մեկ օրինակ բերել, որ որևէ մի բան ամբողջովին ընդունելի լինի ողջ ժողովրդի համար: Միշտ լինում են քննադատողներ: Եվ ես շատ ուրախ եմ, որ դուք անհատական օրինակներ եք բերում և մատնանշում եք անհատ մարդկանց: Ես ասում եմ՝ կա կոնսենսուս, քաղաքական ուժերի, քաղացիական հասարակության, հասարակական կազմակերպությունների մեծամասնությունը ողջունում են սահմանադրական փոփոխությունները»:

Անդրադառնալով Լևոն Զուրաբյանի հայտարարությանը, թե Սահմանադրական դատարանի նախագահ Գագիկ Հարությունյանը կաշառել է Վենետիկի հանձնաժողովին, Վահրամ Բաղդասարյանը նշեց. «Անընդհատ ուզում եք այդ բառը կրկնեմ… Լևոնին Լենին պապիկ եք դարձնում, ուզում եք, որ ես սևեռվեմ: Ցավում եմ, որ անձեռնմխելիություն ասվածը կա. պատգամավորը կարող է հանիրավի մեղադրանքներ առաջադրել միջազգային կառույցի հասցեին ու մնալ անպատիվ, անպատասխան»:

Հիշեցնենք, որ Վենետիկի հանձնաժողովը մեկ քայլ առաջ էր գնահատել Սահմանադրական բարեփոխումների նախագծի մշակված տարբերակը: