«Մեզ ընդունեցին և ճանապարհեցին երկար ծափահարություններով». Պարոնյան թատրոնի հյուրախաղերը՝ ԱՄՆ-ում

Մշակույթ 13:40 13/10/2015

Հ. Պարոնյանի անվան երաժշտական կոմեդիայի պետական թատրոնը հյուրախաղերով հանդես է եկել ԱՄՆ Կալիֆորնիա նահանգի Գլենդեյլ քաղաքում՝ ներկայացնելով Ա. Շիրվանզադեի «Մորգանի խնամին» բեմադրությունը (բեմադրիչ՝ Երվանդ Ղազանչյան): Լրագրողների հետ հանդիպման ժամանակ ասաց ՀՀ մշակույթի նախարարության աշխատակազմի ժամանակակից արվեստի վարչության պետ Արմինե Ղազարյանը:

«Նվեր էր մեր սփյուռքահայ հանդիսատեսին, ևս մեկ հնարավորություն ընձեռվեց նրանց շփվելու հայ արվեստի, դերասանների հետ»,- նշեց նա:

Ա. Ղազարյանի խոսքով, այս հյուրախաղերը կարևոր էին ոչ միայն սփյուռքահայ հանդիսատեսի, այլ նաև թատրոնի համար՝ հանդես գալ միջազգային բեմում:

Հ. Պարոնյանի անվան երաժշտական կոմեդիայի պետական թատրոնի գեղարվեստական ղեկավար Երվանդ Ղազանչյանն էլ ասաց, որ եթե որևէ թատրոն հանդես է գալիս հյուրախաղերով, նշանակում է, այդ թատրոնի ներկայացումը նորովի է երևում:

Նրա խոսքով, թեև ներկայացումը կոմեդիա էր, կար երաժշտություն, պար, բայց վերջում իր թեմայով ցնցեց հանդիսատեսին:

«Ներկայացումն ունեցավ մեծ հաջողություն»,- ընդգծեց Ե. Ղազանչյանը:

Ե. Ղազանչյանը կարևորեց այն, որ երկրորդ ներկայացմանը ներկա էին միայն հայկական դպրոցների աշակերտները՝ ուսուցիչների և ծնողների հետ:

Դերասանուհի Անի Քոչարյանն ասաց, որ հանդիսատեսն իրենց ընդունել և ճանապարհել է երկար ծափահարություններով:

Դերասան Հովակ Գալոյանի խոսքով, իրենք աշխատել են մեկ ընտանիքի պես և ստացել են արդյունք:

Ներկայացման ավարտին Կալիֆորնիայի կոնգրեսական Ադամ Շիֆը, հյուպատոս Սերգեյ Սարկիսովը, Լոս Անջելեսի 5-րդ օկրուգի կառավարիչ Միխայիլ Անտոնովիչը, Գլենդեյլի քաղաքապետ Արա Նաջարյանը դիպլոմներ և պարգևներ են հանձնել ներկայացման մասնակիցներին:

Թատրոնը նաև հաջորդ տարվա համար ունի հրավերներ, մասնավորապես ԱՄՆ կամ Կանադա: Ներկայացվելու են հայ հեղինակի գործեր:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: