Ձեր վստահելի աղբյուրը

Հայաստանի Հանրապետության արդարադատության նախարար Արփինե Հովհաննիսյանի հանձնարականով այսօր ՀՀ արդարադատության նախարարի տեղակալ Սուրեն Քրմոյանը ՀՀ ԱՆ քրեակատարողական վարչության պետի առաջին տեղակալ Ռաֆայել Հովհաննիսյանի հետ այցելել է «Նուբարաշեն» քրեակատարողական հիմնարկում պահվող, հոկտեմբերի 12-ից հացադուլի մեջ գտնվող ցմահ դատապարտյալներին:

Այդ մասին Panorama.am-ին տեղեկացնում են ԱՆ լրատվական ծառայությունից: Ըստ աղբյուրի, նախարարի տեղակալն ու ՔԿՎ պետի առաջին տեղակալը տեղում ծանոթացել են դատապարտյալների խնդիրներին, քննարկել դրանց լուծման ճանապարհները՝ հորդորելով նրանց դադարեցնել հացադուլն ու զերծ մնալ ծայրահեղ քայլերից ու գործողություններից: Ցմահ դատապարտյալներին տեղեկացվել է նաև վիճակի բարելավմանը միտված մի շարք օրենսդրական նախաձեռնությունների մասին:

Նաև վստահեցնում են, որ Արդարադատության նախարարությունը մշտապես ուշադրության կենտրոնում է պահում ցմահ ազատազրկման դատապարտված անձանց խնդիրները՝ ձեռնարկելով գործուն քայլեր դրանց լուծման ուղղությամբ: Ավելի վաղ Panorama.am-ը տեղեկացրել էր, որ «Նուբարաշեն» քրեակատարողական հիմնարկում գտնվող շուրջ 50 ցմահ դատապարտյալներ հացադուլ էին հայտարարել՝ իրենց վերաբերյալ քրեական գործերը վերանայելու պահանջով:

Նախորդող հրապարակումներ՝
Արդարադատության նախարարությունը աշխատում է ցմահ դատապարտյալների հետ, որ դադարեցնեն հացադուլը