«Մարդը հարուստ է իր արմատներով». Տիգրան Մանսուրյան
«Վերադարձի» դասական երաժշտության 8-րդ փառատոնի շրջանակում լինելու են նաև հայաստանյան պրեմիերաներ: Լրագրողների հետ հանդիպման ժամանակ ասաց փառատոնի հիմնադիր «Արվեստների Պատկերասրահ» մշակութային հիմնադրամի նախագահ Մարիամ Շահինյանը:
«Վերադարձի» դասական երաժշտության 8-րդ փառատոնը նվիրվում է Հայոց Մեծ Եղեռնի 100-րդ տարելիցին: Այն կայանալու է հոկտեմբերի 19-ից նոյեմբերի 7-ը:
Փառատոնի հանդիսավոր բացման համերգի (Արամ Խաչատրյան համերգասրահ) ընթացքում առաջին անգամ կհնչի Ստեփան Լուսիկյանի «Դեպի Գողգոթա» դաշնամուրային կոնցերտը` ՀՀ Ժողովրդական արտիստ Սվետլանա Նավասարդյանի մենակատարմամբ: Նույն համերգին հանդիսատեսը նաև հնարավորություն կունենա ունկնդրելու երկար տարիներ երևանյան համերգասրահներում չկատարված Էդգար Հովհաննիսյանի «Կոնցերտ Բարոկոն» (մենակատար` Անի Բատիկյան, Մեծ Բրիտանիա), Ալֆրեդ Շնիտկեի թիվ 1 Կոնչերտո Գրոսսոն (մենակատարներ` Անի Բատիկյան, Աստղիկ Վարդանյան), Տիգրան Մանսուրյանի Ֆանտազիա դաշնամուրի և լարայինների համար ստեղծագործությունը (Սվետլանա Նավասարդյան): Փառատոնի հանդիսավոր բացման համերգի նվագախումբը Հայաստանի պետական կամերային նվագախումբն է, որի գեղարվեստական ղեկավար և գլխավոր դիրիժոր Վահան Մարտիրոսյանը հանդես կգա նաև որպես դաշնակահար` Յ. Ս. Բախի ֆա մինոր Դաշնամուրային Կոնցերտի կատարմամբ:
«Հետաքրքիր փառատոն է, որի ընթացքում հնչելու են շատ հետաքրքիր ստեղծագործություններ»,- նշեց Մ. Շահինյանը:
Ասուլիսին ներկա կոմպոզիտոր Տիգրան Մանսուրյանի խոսքով, փառատոնը մեծ առաքելություն ունի՝ ոչ միայն գեղագիտական հաճույք է պատճառելու, այլ նաև կոչ է արտերկրում բնակվող մեր տաղանդավոր երաժիշտներին՝ վերադարձ դեպի Հայաստան, դեպի արմատներ. «Մարդը հարուստ է իր արմատներով: Այդ դեպքում մեր թռիչքը բարձր է, բովանդակալի»:
Տ. Մանսուրյանը նշեց, որ փառատոնը հրաշալի մշակութային իրադարձություն է մեր երաժշտական, մշակութային կյանքում:
Դաշնակահարուհի Սվետլաննա Նավասարդյանն էլ կարևորեց այն փաստը, որ փառատոնի շրջանակներում Հայաստան են վերադառնում Հայաստանից տարբեր նպատակներով՝ սովորելու, աշխատելու, հեռացած երաժիշտներ:
Փառատոնի 5 համերգների ընթացքում հայ հանդիսատեսին կներկայացվեն դասական երաժշտության տարբեր ուղղություններ և ժամանակաշրջաններ ընդգրկող ստեղծագործություններ:
Փառատոնի 2-րդ համերգը կկայանա հոկտեմբերի 24-ին Կոմիտասի անվան կամերային երաժշտության տանը: Ֆրանսիայում ապրող և ստեղծագործող տաղանդաշատ ջութակահար և դիրիժոր Հայկ Դավթյանի շուրջ համախմբված «Նաիրի» լարային կվինտետը, անվանի մեցցո-սոպրանո Աննա Մայիլյանի հետ համատեղ, հանդես կգան Հայող Ցեղասպանության 100-րդ տարելիցին նվիրված հատուկ ծրագրով:
Փառատոնի 3-րդ համերգը (նոյեմբերի 2, Կոմիտասի անվ. կամերային երաժշտության տուն) կներկայացնի դաշնակահարուհի, բազմաթիվ միջազդային մրցույթների դափնեկիր Լիլիթ Գրիգորյանը (Բելգիա): Արտերկրում ուսումնառության և կատարելագործման երկար ճանապարհ անցած տաղանդաշատ դաշնակահարը հայ հանդիսատեսի առջև հանդես կգա յուրօրինակ «հաշվետվությամբ»` ներկայացնելով դաշնամուրային երկացանկի փայլուն և վիրտուոզ նմուշներից բաղկացած ծրագիր:
Փառատոնի 4-րդ համերգի ընթացքում (նոյեմբերի 5, Կոմիտասի անվան կամերային երաժշտության տուն) հայ հանդիսատեսին կներկայացվի նոր երաժշտախմբի` «Վերադարձի» փառատոնի Կվինտետի ստեղծագործական աշխատանքը: Տարբեր երկրներում ապրող և ստեղծագործող հայ և օտարազգի երաժիշտները միավորվել են «Վերադարձի» փառատոնի գաղափարի շուրջ` ստեղծելով «Վերադարձ» անունը կրող երաժշտախումբ, որն առաջին անգամ կներկայանա հանդիսատեսին:
Փառատոնի եզրափակիչ համերգը (նոյեմբերի 7, Կոմիտասի անվան կամերային երաժշտության տուն), կազմակերպիչների ներկայացմամբ, խորհրդանշում է կյանքի շարունակականությունն ու լավատեսությունը: Եվրոպայում մեծ ճանաչում ունեցող Տանգո Կարբոն անսամբլը (Ֆրանսիա) կներկայացնի համաշխարհային տանգոյի գլուխգործոցները: Ջութակահար Դավիթ Հարությունյանը և իր երաժիշտ գործընկերները աշխարհի տարբեր երկրներում շրջագայությունից հետո ելույթ կունենան Հայաստանում` եզրափակելով «Վերադարձի» դասական երաժշտության 8-րդ փառատոնը:
Փառատոնն անցկացվում է ՀՀ նախագահի տիկին Ռիտա Սարգսյանի բարձր հովանու ներքո և «ՎիվաՍել-ՄՏՍ»-ի գլխավոր գործընկերությամբ:
Նախորդող հրապարակում՝
«Վերադարձի» փառատոն. Դասականից մինչև ժամանակակից երաժշտության հինգ համերգ
Լրահոս
Տեսանյութեր
Հայաստանի ու հայ ժողովրդի շահերը պաշտպանող իշխանություն գոյություն չունի. Բագրատ Սրբազան
