Միջազգային համբավ վայելող երկու երաժիշտ՝ հայկական բեմում
«Արամ Խաչատրյան» համերգասրահում Արամ Խաչատրյանի անվան 3-րդ միջազգային փառատոնի շրջանակում այսօր ելույթ է ունենալու աշխարհահռչակ երկու երաժիշտ՝ թավջութակահար Սուրեն Բագրատունունին ( ԱՄՆ) և դիրիժոր Հիրոֆումի Յոշիդային (Ճապոնիա)։ Այս մասին հայտնում են Հայաստանի պետական երիտասարդական նվագախմբի
հասարակայնության հետ կապերի բաժնից:
Սուրեն Բագրատունին աշխարհում ամենահայտնի թավջութակահարներից մեկն է։ Հանդես է գալիս որպես մենակատար և կամերային երաժիշտ՝ ներկայանալով Եվրոպայում, Ասիայում, Աֆրիկայում, Ավստրալիայում, Հարավային և Հյուսիսային Ամերիկայում։ 30 տարուց ավելի Սուրեն Բագրատունու անունը կապված է թավջութակի կատարողական արվեստում ամենալուրջ նվաճումների հետ։ Սուրեն Բագրատունին նաև հայտնի մանկավարժ է, նա Միչիգանի պետական համալսարանի վաստակավոր պրոֆեսոր է, ով վարպետության դասեր է անցկացնում ամբողջ աշխարհում։ Nobilis տրիոյի անդամ է, Cello Plus ամենամյա փառատոնի գեղարվեստական ղեկավարն է։
Հիրոֆումի Յոշիդան իր սերնդի առաջատար դիրիժորներից մեկն է, ում հաճախ անդրադառնում են համաշխարհային լրատվամիջոցները։ 1996-ի օգոստոսին նա հաղթող է ճանաչվել իտալական Վալսոլդա քաղաքում տեղի ունեցած Դիրիժորների 19-րդ միջազգային մրցույթում։ 2002-ին Gotoh Memorial մշակութային մրցանակի «Օպերային արվեստ» անվանակարգում մաեստրոն արժանացել է «Ամենախոստումնալից երիտասարդ տաղանդ» կոչմանը (պատմության մեջ առաջին դիրիժորն է, ով արժանացել է այս տիտղոսին), ունի բազմաթիվ այլ նվաճումներ։ Մաեստրո Յոշիդան ղեկավարել է այնպիսի նվագախմբեր, ինչպիսիք են Տրանսիլվանիայի սիմֆոնիկ նվագախումբը, Բուդապեշտի համերգային նվագախումբը, Հռոմի օպերային թատրոնի սիմֆոնիկ նվագախումբը, Վերդիի թատրոնի նվագախումբը, Կահիրեի օպերային թատրոնը, Սիցիլիայի Մասիմո թատրոնը, Բոլոնիայի օպերային թատրոնը և այլն։
Խաչատրյանական փառատոնի հոկտեմբերի 17-ի համերգին Հիրոֆումի Յոշիդայի ղեկավարությամբ Հայաստանի պետական երիտասարդական նվագախումբը կկատարի Բեդրժիխ Սմետանայի «Վլտավա» սիմֆոնիկ պոեմը «Իմ հայրենիքը» շարքից, Անտոնին Դվորժակի Թավջութակի կոնցերտ սի մինոր, մենակատար՝ Սուրեն Բագրատունի, ինչպես նաև՝ Անտոնին Դվորժակի Սիմֆոնիա թիվ 9 «Նոր աշխարհից»։
Երեկոն նվիրվում է անվանի դիրիժոր Դավիթ Խանջյանի 75-ամյակին։
Հիշեցնենք, որ Արամ Խաչատրյանի անվան միջազգային երրորդ փառատոնը մեկնարկել է հոկտեմբերի 3-ին: Փառատոնը ներառում է 20 սիմֆոնիկ և կամերային երեկո, սիմֆոնիկ համերգները՝ յուրաքանչյուր շաբաթ և կամերայինը՝ չորեքշաբթի օրերին: Փառատոնն անցացվում է ՀՀ մշակույթի նախարարության աջակցությամբ, Դասական երաժշտության աջակցության հասարակական կազմակերպության և Հայաստանի պետական երիտասարդական նվագախմբի նախաձեռնությամբ՝ ՀՀ Նախագահ Սերժ Սարգսյանի հովանու ներքո:
Նախորդող հրապարակումներ՝
Առաջին անգամ Արամ Խաչատրյանի ստեղծագործությունները կներկայացվեն ջազային մշակմամբ
Հետաքրքիր երկու ամիս՝ հայաստանյան երաժշտական կյանքում. Արամ Խաչատրյանի անվան միջազգային փառատոն
Արամ Խաչատրյանի անվան փառատոն. «Բոլոր արտիստները հասկանում են, թե ինչ կարևոր տարի է մեզ համար»
Լրահոս
Տեսանյութեր
Ուզում են երկիրը Հյուսիսային Կորեա սարքեն, մենք էլ դառնանք իրենց համբալները. Բողոքի ակցիա
