Ձեր վստահելի աղբյուրը

2015 թվականի սեպտեմբերի 30-ի դրությամբ` Հայաստանում կնքվել է 440 հազար 286 ԱՊՊԱ պայմանագիր, որոնց համար հաշվեգրված ապահովագրավճարները կազմել են մոտ 13,1 մլրդ դրամ: Ինչպես Panorama.am-ը տեղեկանում է Հայաստանի ավտոապահովագրողների բյուրոյից, նախորդ ամսվա համեմատ կնքված պայմանագրերի ցուցանիշն աճել է 3 հազար 152-ով, իսկ տարեսկզբի համեմատ՝ 826-ով:

Ըստ բյուրոյի՝ 6 ապահովագրողները միասին այս տարվա հունվարի 1-ից մինչև սեպտեմբերի 30-ը ընդունել են հատուցում ստանալու համար ներկայացված 29,273 դիմում, որոնցից բավարարվել են 27,869 -ը: Ընդհանուր առմամբ, նշված ժամանակահատվածում ԱՊՊԱ բավարարված դիմումների համար ապահովագրողների կողմից վճարվել է մոտ 5 մլրդ 742,693 մլն դրամ:

Բյուրոյի հրապարակած թվերի համաձայն` ԱՊՊԱ ոլորտում ամենաշատ պայմանագրերը կնքել է «Ռոսգոստրախ-Արմենիա»-ն` 142,591 պայմանագիր, որոնցով հաշվեգրված ապահովագրավճարների մեծությունը կազմել 4 մլրդ 338,244 մլն դրամ: Երկրորդը «Ինգո Արմենիա»-ն է` 97 հազար 358 ԱՊՊԱ պայմանագրերով և հավաքագրված 2 մլրդ 928,122 մլն դրամով: Երրորդ հորիզոնականը զբաղեցնում է «Նաիրի ինշուրանս»-ը` 66 հազար 942 պայմանագրերով ու մոտ 2 մլրդ 072,303 մլն դրամով:

Չորրորդը «Սիլ ինշուրանսն է» է` 50 հազար 929 պայմանագրերով և 1 մլրդ 475,951 մլն դրամ հաշվեգրված ապահովագրավճարներով: Հինգերորդ հորիզոնականում «Ռոսո»-ն է` 50,494 ԱՊՊԱ պայմանագրերով ու 1 մլրդ 342,249 մլն դրամով: Վեցերորդ հորիզոնականում գտնվում է «Արմենիա ինշուրանս»-ը` 31 հազար 972 պայմանագրերով ու 887,2 մլն դրամ հաշվեգրված ապահովագրավճարներով:

Նշենք նաև, որ նշված ժամանակահատվածում հատուցումից հրաժարվելու մասին դիմումների քանակը կազմել է 219, իսկ մերժված դիմումների քանակը՝ 547: