Արի Զաքարյան. «Եվգենյա Մեդվեդևայի իրական ազգանունը Բաբասյան է»
Երևանում կայանալիք «Սառույցի թագավորները» շոու-ծրագրի ժամանակ, Օլիմպիական խաղերի կրկնակի, աշխարհի առաջնության եռակի, Եվրոպայի առաջնության բազմակի չեմպիոն Եվգենի Պլյուշչենկոյից բացի, կսահեն նաև հայ գեղասահորդներ աշխարհի տարբեր երկրներից: Այդ մասին լրագրողների հետ հանդիպման ժամանակ ասաց Պլյուշչենկոյի մենեջեր Արի Զաքարյանը:
«Սառույցի թագավորները» շոուն մոտ 9 տարվա պատմություն ունի: Երևանյան ծրագրում շեշտը դրված է նաև հայ գեղասահորդների մասնակցության վրա: Մենք մեր առաջ խնդիր դրեցինք հայ հադիսատեսին ներկայացնելու այն մարզիկներին, որոնց մասին շատ քիչ գիտեն այստեղ: Այսօր դա հնարավոր կլինի անել Եվգենիի և իմ ընկերների օգնությամբ:
Ես հպարտ եմ, որ հայ եմ և հնարավորություն ունեմ լավ բան անել իմ հայրենակիցների համար: Առաջին հերթին ցանկանում եմ, որ իմանաք՝ մենք ունենք շատ շնորհալի հայ մարզիկներ, մարզիչներ, ովքեր հենց այս մարզաձևում են: Միգուցե դուք չգիտեք, որ այս տարի ԱՄՆ-ում լավագույն մարզիչ ճանաչվեց Ռաֆայել Հարությունյանը, ով մարզել է շատ հայտնի գեղասահորդների: Նշեմ, որ Ռուսաստանի գեղասահքի երիտասարդ աստղերից մեկի՝ Եվգենյա Մեդվեդևայի իրական ազգանունը Բաբասյան է: Շատ հայեր կան, ովքեր հայկական գեղասահքի դպրոցն են անցել՝ Գուրգեն Վարդանյանը, ով Անգլիայի լավագույն մարզիչներից մեկն է, Սամվել Հայրապետյանը , ում տղան՝ Սլավիկ Հայրապետյանը, այժմ ներկայացնում է Հայաստանը Եվրոպայի և աշխարհի առաջնություններում, Անաստասիա Գալուստյանը, ովքեր, սակայն, ստիպված են «սառույց փնտրել», որպեսզի հնարավորություն ունենան մարզվելու: Սա մեծ խնդիր է: Մենք հրաշալի երկիր ունենք, ցավալի է, որ չունենք մարզվելու հնարավորություն և տեղ: Շնորհակալություն Իրինա Ռոդնինային, ով մարզադպրոց է կառուցում Երևանում: Այսպիսի նախաձեռնություններ պետք է շատ լինեն: Դա առաջին հերթին ազգի առողջությունն է: Պետք է այս գաղափարը հասցնել մարդկանց, ովքեր հնարավորություն ունեն նման մարզադպրոցներ կառուցել և զարգացնել այս մարզաձևը մեր երկրում»,- Զաքարյանի խոսքերը մեջբերել է ՀԱՕԿ-ի պաշտոնական կայքը:
«Սառույցի թագավորները» շոու-ծրագիրը կկայանա նոյեմբերի 20-ին, մարզահամերգային համալիրում: Բացի Պլյուշենկոյից, ծրագրում հանդես կգան նաև էստրադային ջութակահար Էդգար Հակոբյանը, Տիգրան Պետրոսյանը, սառցե ակրոբատ Սերգեյ Յակիմենկոն և հայ գեղասահորդներ աշխարհի տարբեր երկրներից:
Լրահոս
Տեսանյութեր
ՈՒՂԻՂ. Ազատ արձակել Բաքվում պահվող հայ գերիներին
