«Մեր պայքարը մասնակի հաջողությամբ պսակվեց». «Նաիրիտի» նախկին աշխատակից

Հասարակություն 16:03 21/10/2015

«Նաիրիտ» գործարանի նախկին աշխատակիցները նամակով դիմելու են Հայաստանի նախագահին՝ մանրամասն տեղեկացնելու այն խախտումների մասին, որոնք թույլ են տրվել իրենց աշխատավարձերի պարտքը վերադարձնելու ժամանակ:

«Մեզ պարտադրել են ստրկացուցիչ պայմանագիր ստորագրել: Միայն այդ պարագայում էր, որ կվճարեին աշխատավարձի պարտքը»,- լրագրողների հետ հանդիպման ժամանակ ասաց «Նաիրիտ» գործարանի նախկին աշխատակից Զոհրապ Հովհաննիսյանը:

Նա նշեց, որ իրենց երկարատև պայքարն ավարտվեց հաջողությամբ, բայց հաջողությունը կարելի է մասնակից համար. «Մենք ստացանք տարիների կուտակված աշխատավարձը, սակայն որպես նախապայման ստիպված ենք եղել ստորագրել պայմանագիր «Նաիրիտ 2» գործարանի հետ: Աշխատակիցները ստորագրեցին այդ պայմանագիրը, որով իրենց իրավունքները տույժերի, տուգանքների մասով զիջում են «Նաիրիտ 2» գործարանին, որը դատարանի վճռով «Նաիրիտին» պարտք էր մոտ 5 միլիարդ դրամ»:

Գործարանի մամուլի նախկին խոսնակ Անուշ Հարությունյանի խոսքով, աշխատավարձ ստանալու պահին կային աշխատակիցներ, ովքեր իրենց ձեռքին ունեին դատարանի վճիռը, ըստ որի պետք է իրենց վճարեին ամբողջ պարտքը տույժերի հետ մասին, սակայն նրանք էլ ստացել են միայն իրենց պարտքը՝ առանց տույժերի: Այսինքն, ըստ նրա, ակնհայտ է դառնում, որ Հայաստանում դատարանի որոշումը հիմք չէ:

«Ես չեմ ուզում վերադարձնել տուգանքները: Բայց եթե չեմ ստանում ու զիջում եմ «Նաիրիտին», չեմ ուզում, որ ինչ-որ երրորդ կառույց կարողանա ինչ- որ պահի, երբ «Նաիրիտը» կարողանա աշխատել, իմ տույժն ու տուգանքները պահանջի և ստանա «Նաիրիտից»,- նշեց Ա. Հարությունյանը:

Նաիրիտցիները վաղը հավաքվելու են կառավարության շենքի դիմաց:

Տեքստում սխալ կամ վրիպակ նկատելու դեպքում, ուղարկեք խմբագրին հաղորդագրություն` նշելով տվյալ սխալը, այնուհետև սեղմելով Ctrl-Enter: