Ձեր վստահելի աղբյուրը

Հաջորդ տարվա հունվարի 2-ից արտադրողների ու ներկրողների համար կգործեն միայն ԵԱՏՄ տեխնիկական կանոնակարգերը: Եթե ներազգային օրենքները հակասություններ ունենան այդ կանոնակարգերի հետ, կգործեն ԵԱՏՄ կանոնակարգերը:

«Կանոնակարգերը արտադրական պրոցեսներին, ապրանքին ներկայացվող պարտադիր պահանջներն են, դրանցով սահմանվում են ընթացակարգերը, գրանցման համար պարտադիր պայմանները, ցուցանիշներ, չափանիշները»,-Panorama.am-ի հետ զրույցում ասաց ԳՆ Սննդամթերքի անվտանգության ծառայության պետի տեղակալ Լուսինե Դավթյանը:

Օրինակ, եթե սննդամթերքի արտադրության դեպքում կանոնակարգը սահմանում է, թե ինչպիսի նվազագույն շենքային պայմաններ պետք է լինեն, արտադրությունը ի՞նչ պայմանների պետք է համապատասխանի, եթե սննդամթերքը միս, մսամթերքն է, ապա ավելանում են ևս մի քանի պահանջներ:

«Դիտարկենք կաթնամթերքը: Գործող կանոնակարգերով սահմանված պահանջները բավականին թույլ են և մեղմ, օրինակ, պիտակավորման պահանջների խստացում է լինելու: Եթե մինչ այժմ պետք է նշվեր, թե ինչքան ճարպ կա դրա մեջ, հիմա պարտադիր է լինելու թե ինչ յուղայնությամբ է այն»,-ասաց ՍԱՊԾ պետի տեղակալը, ավելացնելով, որ խստացվել են հիգիենային վերաբերող պահանջները:

Լ. Դավթյանն այն համոզման է, որ արտադրողների վրդովմունքը պայմանավորված է պիտակավորման փոփոխությամբ. «Իրենք պիտակ պետք է փոխեն, փաթեթավորում պիտի փոխեն, իսկ դա ռեբրենդինգ է նշանակում: Իսկ դա ցանկացած տնտեսվարողի համար ցնցում է»:

Նրա խոսքով, այս ամենին պատրաստվելու համար հայ արտադրողները մեկ տարի ժամանակ են ունեցել:

«ԵԱՏՄ կանոնակարգերի գործելու դեպքում հայ արտադրողն արտահանման համար լրացուցիչ ծախսեր չի կատարելու, նույն արտադրանքն է լինելու: Մակրոտնտեսական տեսանկյունից այն ձեռնտու է, իսկ միկրոյի դեպքում դիմադրության է հանդիպում»,-ասաց նա:

Կանոնակարգերի համաձայն, Հայաստանում արտադրված սննդի փաթեթավորման վրա պետք է տեղեկատվությունը նշվի ԵԱՏՄ անդամ բոլոր երկրների լեզուներով:

Հիշեցնենք, որ ԵԱՏՄ անդամ երկրներ են Ռուսաստանը, Հայաստանը, Ղազախստանը, Բելառուսը, Ղրղզստանը:

Թեմայի վերաբերյալ կարդացեք նաև՝
2016 թ. հունվարի 2-ից ազգային օրենսդրությունը մի շարք արտադրանքի վերաբերյալ չի կիրառվելու
Ստանդարտների ազգային ֆոնդում կա շուրջ 30 հազար ստանդարտացման փաստաթուղթ. Ենոք Ազարյան