Ձեր վստահելի աղբյուրը

Դեկտեմբերի 6-ին կայանալիք հանրաքվեում «Ոչ»-ի ճակատը, որի կազմում են խորհրդարանական Հայ Ազգային կոնգրես և «Ժառանգություն» կուսակցությունները, այս օրերին ռեսուրսների հաշվառում է կատարում` ընտրական հանձնաժողովներում ներկայացուցիչներ ունենալու համար: ՀԱԿ-ից վստահեցնում են, թե ամեն ինչ լավ է, ռեսուրսներ կան, իսկ «Ժառանգություն»-ում որոշ խոչընդոտների առաջ են կանգնել:

«Ոչ»-ի համատեղ շտաբի անդամ, ՀԱԿ կուսակցության ներկայացուցիչ Սամվել Աբրահամյանը Panorama.am-ին վստահեցրեց, թե իրենք խնդիրներ չունեն` կան ռեսուրսներ և ներկայացված կլինեն բոլոր 1997 ընտրատեղամասերում:

«Կա ձևավորված «Ոչ»-ի շտաբ, որտեղ միավորվել են մի քանի քաղաքական ուժեր, որոնք բոլորն էլ պայմանավորվել են իրենց ուժերը, ռեսուրսները մեկտեղել և հիմա այդ աշխատանքներն ընթանում են: Այո, մենք ունենք բավարար ռեսուրս, որպեսզի կարողանանք վերահսկել հանրաքվեի գործընթացը», -փոխանցեց պարոն Աբրահամյանը:

Այս պահին, նրա խոսքով, իրենք զբաղված են ռեսուրսների հաշվառում կատարելով, քանի որ ըստ ԿԸՀ հաստատված ժամանակացույցի, հանրաքվեի տեղամասային հանձնաժողովներում անդամներ նշանակելու հայտերը ԿԸՀ ներկայացվում են մինչև նոյեմբերի 6-ը:

«Մինչև նոյեմբերի 6-ը կներկայացնենք հանձնաժողովներում մեր թեկնածուներին, իսկ մինչև հանրաքվեն մենք ժամանակ ունենք վստահված անձանց հավաքագրել: Ամբողջ պատկերը այդ ամենի կտեսնեք դեկտեմբերի 6-ին` հանրաքվեի օրը», -հավելեց Աբրահամյանը` ընդգծելով, որ նախկինում տեղի ունեցած համապետական ընտրություններում ևս իրենք հանձնաժողովներում մարդկային ռեսուրսների խնդիր չեն ունեցել:

«Ամեն ինչ հալած կարագի պես է, բոլորն էդ հարցով են զբաղվում», -իր հերթին իրավիճակը պատկերավոր ներկայացրեց Արամ Մանուկյանը:

«Հալած կարագի» պես հարթ չէ վիճակը «Ժառանգություն» կուսակցությունում, որը լինելով խորհրդարանական ուժ պետք է ընտրական հանձնաժողովներում ներկայացուցիչներ ունենա:

«Օրենքով սահմանված կարգով, հնարավորինս կփորձենք ներկայացուցիչներ ներկայացնել հանձնաժողովներում: Իհարկե, ցավոք սրտի, այն ամբողջական չի լինի: Բայց քանի որ համագործակցում ենք «Չեք անցկացնի» երիտասարդական նախաձեռնության հետ, պետք է այնպես անենք, որ բոլոր տեղամասերում ընդդիմության անդամներից լինեն: Իրենց հետ համակարգում ենք և փորձում ենք այդպես բացը լրացնել», -Panorama.am-ի թղթակցի հետ զրույցում ասաց «Ժառանգություն» կուսակցության փոխնախագահ Արմեն Մարտիրոսյանը:

Հարցին, թե ինչ է նշանակում ամբողջական չի լինի, այսինքն բոլոր 1997 ընտրատեղամասերում «Ժառանգություն»-ը չի՞ ունենա ներկայացուցիչ, Մարտիրոսյանը պատասխանեց. «Ոչ, այդքան չունենք: Ցավոք սրտի, չունենք»:

Պատճառները, ըստ «Ժառանգության» փոխնախագահի շատ են. «Ծանր աշխատանք է, մարդիկ տեսնում են, թե ինչ բռնություններ են կիրառվում ընտրությունների ժամանակ, չեն ցանկանում դրա մեջ մտնել: Ունենք բավական թվով անդամներ, ովքեր արտագաղթել են: Բացի այդ, այս անգամ հանձնաժողովի անդամի վերապատրաստման դասընթացներին մեծ մասը կտրվել է` ժամեր են նշանակված եղել դասերի կամ քննության համար, ինչը հարմար չի եղել անդամի համար»:

Հանձնաժողովներում բաց տեղերը, ըստ Արմեն Մարտիրոսյանի, «ոչ»-ի ճակատը փորձելու է լրացնել միմյանց հետ համագործակցությամբ:

Ընդդիմադիր գործիչի խոսքով, Հայաստանի ընտրական հանձնաժողովներում անդամ լինելու համար «բարոյահոգեբանական բարձր պատրաստվածություն» է պետք:

«Իշխանությանը հաճախ հաջողվում է գայթակղել հանձնաժողովի անդամներին կամ ահաբեկել: Հնարավորինս փորձելու ենք քվեարկությունը վերահսկելի պահել», -հավելեց Արմեն Մարտիրոսյանը: