Ձեր վստահելի աղբյուրը

Դսեղի և Եղեգնուտի անտառների վիճակը վախեցնող էին: Այս մասին այսօր լրագրողների հետ հանդիպմանն ասաց Համահայկական Բնապահպանական Ճակատի (ՀԲՃ) համակարգող խմբի անդամ Լևոն Գալստյանը՝ տեղեկացնելով, որ «Անտառների հասարակական մոնիտորինգ» ծրագրի շրջանակներում առաջին այցելությունը Լոռու մարզ էր:

Նրա խոսքերով, անտառներում տեսած իրավիճակն իրեն ուղղակի զարմացրել է. «Դսեղում 600 անօրինական հատված ծառ հայտնաբերեցինք, տարբեր տեսակի, տրամագծի և վաղեմության: Եղեգնուտում՝ շուրջ 500 հատված ծառ: Ցավոք սրտի չտեսանք որևէ կնիք, որը որ ցույց կտար գոնե, որ դրանցից մի մասը օրինական է հատվել»:

Նա նկատեց՝ այն ինչ որ կատարվում է մեր անտառներում, մոտակա 30-50 տարիների ընթացքում բերելու է լուրջ խնդիրների. «Անտառը միայն վառելափայտ չէ, այլ ունի շատ ու շատ այլ նշանակություններ՝ էկոհամակարգի պահպանման, նաև սողանքապաշտպան»:

Հանդիպմանը ներկա ՀԲՃ համակարգող խմբի անդամ Անի Խաչատրյանի խոսքերով էլ, պատկան մարմինները, եթե ցանկություն ունենան բացահայտելու, շատ հեշտությամբ կարող են բացահայտել այդ ապօրինությունները:

«Կտրված ծառերից դատելով, ենթադրում ենք, որ դա ոչ միայն վառելիքի խնդրի լուծման համար է հատված, այլ շատ ուրիշ նպատակներով, քանի որ հատված ծառերի մասեր կային, որոնք թողել էին այնտեղ, տարել էին ծառերի այն հատվածները, որոնք իրենց պետք էին»:

Ըստ խմբի անդամի՝ այստեղ անհատի ու գյուղացու խնդիր չէ. «Երբ գնում են անտառում սղոցով աշխատող գյուղացի տեսնում, գործը ջարդում նրա գլխին: Անտառահատումները միայն գյուղացու գլխին ջարդելով չէ, խնդիրը համակարգային է և պետք է գտնել հիմնական մեղավորներին»:

Լևոն Գալստյանն էլ հավելեց, որ իրենց այցելությունները ուղղակի սիրողական մակարդակի չեն եղել, իրենք փաստեր ներկայացնող լուսանկարներ և տեսագրություններ ունեն, որոնք ներկայացրել են համապատասխան մարմիններին: