Ադրբեջանում խորհրդարանական ընտրություններ են
Ադրբեջանում սկսվել է խորհրդարանական ընտրությունների քվեարկությունը: Ընտրական տեղամասերը աշխատում են ժամը 08:00-ից: Քվեարկությունը կավարտվի ժամը 19:00-ին:
Ըստ Ադրբեջանի Կենտրոնական ընտրական հանձնաժողովի «Ընտրություններ» տեղեկատվական կենտրոնի ղեկավար Ռուֆաթ Գյուլմամեդովի հայտնած տվյալների՝ ժամը 10.00-ի դրությամբ քվեարկել են ընտրողների 12,8% -ը (667.732 ընտրող): Այս մասին հաղորդում է ադրբեջանական լրատվական գործակալություն «Թրենդը»:
Նշվում է, որ քվեարկության ընթացքի, ընտրողների մասնակցության ակտիվության մասին նախնական տվյալները կհաղորդվեն օրվա ընթացքում 5 անգամ (ժամը 10:00-ին, 12:00-ին, 15:00-ին, 17:00-ին և 19:00-ին): Տվյալները կտրամադրվեն Կենտրոնական ընտրական հանձնաժողովին (ԿԸՀ)-ին կից տեղեկատվական կենտրոնի կողմից: Ընտրությունների նախնական արդյունքները կհայտարարվեն գիշերը և կտեղադրվեն ԿԸՀ-ի կայքում շրջանային ընտրական հանձնաժողովների ընդհանրացված արձանագրություններն ըստ ընտրատեղամասերի ստանալուց անմիջապես հետո:
Ադրբեջանում խորհրդարանական ընտրությունների ընթացքին հետևում է 503 միջազգային դիտորդ 40 կազմակերպություններից, այդ թվում` Եվրոպայի խորհրդի Խորհրդարանական վեհաժողովից (ԵԽԽՎ), Անկախ Պետությունների Համագործակցության (ԱՊՀ) Միջխորհրդարանական վեհաժողովից, Թուրքալեզու երկրների խորհրդարանական վեհաժողովից: Դիտորդական առաքելություն իրականացնող ամենամեծ խումբը ԱՊՀ –ին է ՝ 150 դիտորդ, ԵԽԽՎ դիտորդների խումբը բաղկացած է 30 աշխատակիցներից:
Ադրբեջանի խորհրդարանի 125 տեղի համար պայքարում է 767 պատգամավորի թեկնածու: 119 ընտրատարածքների 1000 ընտրատեղամասերում տեղադրված են տեսախցիկներ:
Իրենց ձայնի իրավունքից 5547 ընտրատեղամասերում կարող են օգտվել 5.2 մլն. Ադրբեջանի քաղաքացի: Ադրբեջանի օրենսդրությունը չի սահմանում ընտրողների նվազագույն շեմը: Խորհրդարանական ընտրություններն Ադրբեջանում 2005 թ-ից անցկացվում են միայն մեծամասնական համակարգով: Պատգամավոր է ընտրվում այն թեկնածուն, ով ստացել է ձայների մեծամասնությունն իր ընտրատարածքում: Ընտրությունները կհամարվի վավեր՝ անկախ ընտրողների թվից:
«Exit-poll» իրականացնելու են 4 կազմակերպություն՝ տեղի «ELS» և «Ряй» հետազոտական կենտրոնները, ամերիկյան «Arthur J. Finkelstein & Associates» և ֆրանսիական «OpinionWay» կազմակերպությունները: Նրանք իրականացնելու են ընտրողների հարցում նրանց քվեարկությունից անմիջապես հետո:
Ինչպես հաղորդում է ադրբեջանական «ԱՊԱ» լրատվական գործակալությունը, ԿԸՀ նախագահը Մազահիր Պանախովը մամուլի ասուլիսի ժամանակ հայտարարել է, որ ընտրատարածքներում թեկնածուների առավելագույն թիվը 12-ն է, իսկ նվազագույնը՝ 3-ը: Ընտրություններին մասնակցում են 15 կուսակցություն և 7 կուսակցություններից բաղկացած «Ազադլիգ 2015» («Ազատություն 2015») դաշինքը:
Մ. Պանախովի խոսքերով՝ Ադրբեջանի ընտրությունների օրն անվտանգության ապահովան համար իրավապահպան մարմինների կողմից իրականցնում են միջոցառումներ: «Ընտրությունների ընթացքում համապատասխան մարմիններն իրականացնում են միջոցառումներ, քանի որ որոշ ուժեր ընտրությունների ավարտից հետո կարող են գնալ այնպիսի քայլերի, որոնք երկրոդ պլան կմղեն ընտրությունները», – ասել է նա:
Պանախովն ավելացրել է, որ Ադրբեջանի Ներքին գործերի նախարարությունը ևս աշխատելու է արտահերթ օրակարգով՝ երկրում կարգուկանոն ապահովելու նպատակով: «Այդուհանդերձ, ընտրատեղամասերից 100 մետր հեռավորության վրա պետք է լինեն ոստիկանության ներկայացուցիչներ: Բացի այդ՝ մենք ամեն անգամ կրկնում ենք, որ ցանկացած միջադեպի պարագայում ոստիկաններ կլինեն նաև ընտրատեղամասերում», – հավելել է ԿԸՀ նախագահը:
Ընտրություններից երկու առաջ, գնահատելով իրավիճակը, նա ընդգծել է, որ օրենքի խախտման դեպքեր չեն գրանցվել, իսկ ինչ վերաբերում է սոցիալական կայքերում քննարկումներին, ապա ԿԸՀ-ն դրանց ուշադրություն չի դարձնում:
Դրա հետ մեկտեղ, ռուսական «ТАСС» լրատվական գործակալության հաղորդմամբ, ընտրություններից մի քանի օր առաջ խորհրդարանական ընտրություններին մասնակցելուց հրաժարված ընդդիմադիր «Մուսաֆաթ» կուսակցության թեկնածուների անունները, այդուհանդերձ, ընդգրկվել են քվեաթերթիկներում: Ըստ Մ. Պանախովի՝ քվեաթերթիկներում որևէ փոփոխություն մտցնելն ընտրություններից տասն օր առաջ արգելվում է օրենքով: «Եթե մարդիկ ընտրեն նրանց, ԿԸՀ-ն կճանաչի ընտրության արդյունքները: Իսկ նրանք արդեն կորոշեն հրաժարվել պատգամավորի մանդատից, թե՝ ո՛չ», – ասել է Պանախովը:
«Ժողովրդավարական նախաձեռնությունների ինստիտուտ» ՀԿ-ի տվյալներով՝ քվեաթերթիկներում ընդգրկված պատգամավորի թեկնածուների մեծամասնությունն իշխող «Ենի Ադրբեջան» կուսակցության անդամներն են՝ 115 թեկնածու: Նրա հաջորդում են ընդդիմադիր «Մուսավաթ» կուսակցությունը 24, «Միասնական Ադրբեջանի ժողովրդական ճակատ» կուսակցությունը 22, «Ազադլիգ - 2015» կուսակցությունների դաշինքը 20, ընդդիմադիր «Ումիդ» («Հույս») կուսակցությունը 17, «Ազգային վերածննդի շարժում» կուսակցությունը 16, «Մեծ արարում» կուսակցությունը 15, «Քաղաքացիական համերաշխության» կուսակցությունը 14, «Ժողովրդավարական բարեփոխումների» կուսակցությունը 12, «Ազգային անկախության» կուսակցությունը 10 թեկնածուներով: Բացի այդ, որպես անկուսակցական պատգամավորի թեկնածուներ առաջադրվել են նաև ընդդիմադիր կառույցների ներկայացուցիչները, այդ թվում՝ Հանրապետական այլընտրանք» (ReAl) քաղաքացիական շարժման 10, «Nida» շարժման 2, «Դ-18»-ի 1 և «Սպիտակ դաշինքի» 3 անդամներ:
Հիշեցնենք, որ միջազգային կազմակերպությունները բավականին խիստ դիրքորոշում ունեն Ադրբեջանի 2015 թվականի խորհրդարանական ընտրությունների վերաբերյալ: Այս տարվա սեպտեմբեր 11-ին Ժողովրդավարական հաստատությունների և մարդու իրավունքների գրասենյակի (ԺՀՄԻԳ տնօրեն Մայքլ Լինքը հայտարարել է, որ, պայմանավորված Ադրբեջանին իշխանությունների կողմից սահմանափակումներով, ԺՀՄԻԳ-ը չեղյալ է համարում իր դիտորդական առաքելությունը երկրի խորհրդարանական ընտրություններում: Նախկինում ԺՀՄԻԳ-ը տեղեկացրել էր Ադրբեջան 380 դիտորդներ ուղարկելու մտադրություն մասին:
Լրահոս
Տեսանյութեր
ԱՄՆ-ում հրդեհների հետևանքով մոխրացել է Սահակ-Մեսրոպ հայ քրիստոնյա վարժարանը
