Ձեր վստահելի աղբյուրը

2016 թվականի պետական բյուջեով աշխատավարձի ու թոշակի բարձրացում չի նախատեսվում, սակայն եթե առաջին անհրաժեշտության ապրանքների գներն ավելի բարձր լինեն, իհարկե, դա սոցիալական վիճակի վրա բացասական ազդեցություն կունենա: Այս մասին այսօր Ազգային ժողվում 2016թ-ի պետական բյուջեի նախագծի քննարկման ժամանակ ասաց ֆինանսների նախարարի առաջին տեղակալ Պավել Սաֆարյանը՝ պատասխանելով ԲՀԿ խմբակցության քարտուղար Նաիրա Զոհրաբյանի հարցին, որ եթե 2017թ. թոշակներն ու աշխատավարձերը չեն բարձրացվելու, ապա սոցիալական նվազագույն զամբյուղը հակասության մեջ չի՞ մտնելու. «Իսկ ես վստահ եմ, որ այս ընթացքում մենք անպայման ունենալու ենք գնաճ»:

Ն. Զոհրաբյանի խոսքերով՝ այդ ամենը սոցիալական լուրջ դժգոհության ալիք կբարձրացնի. «Անգամ ամենահպանցիկ մոնիթորինգն անցկացնելով խանութներում՝ կտեսնենք 10-20 դրամ սահուն բարձրացնում են կաթնամթերքի կամ այլ ապրանքների գները, արդյունքում՝ գնաճ է լինում: Մենք կքննարկենք ու միգուցե ԲՀԿ-ն նվազագույն աշխատավարձի շեմի բարձրացման առաջարկ անի»:

Պ.Սաֆարյանը հայտնեց, որ սոցիալական վիճակի վրա այն շատ մեծ ազդեցություն չի կարող ունենալ. «Անցած տարի մենք աշխատավարձերը կտրուկ բարձրացրեցինք: Հիմա մտածելու բան ա, արդյոք ճի՞շտ արեցինք, որ այդքան կտրուկ բարձրացրեցինք: Հիմա երբ հետ ենք նայում, տեսնում ենք, որ մենք տարեկան բյուջեից 80 մլրդ դրեցինք մենակ աշխատավարձերի բարձրացմանը: Այն ժամանակ մենք կարող էինք 80 մլրդ չբարձրացնել, 20-30 մլրդ բարձրացնեինք, հետո ասեինք՝ գնաճի հետ համապատասխանում է բարձրացումը: Բայց մենք կտրուկ բարձրացրեցինք, գնաճի հետ կապված խնդիրը այդ տեսակետից նայենք»:

Ինչ վերաբերում է թոշակներին, ապա, ըստ Պ.Սաֆարյանի, եթե սպառողական զամբյուղի գնային տարբերություն լինի, իհարկե, բացասական վիճակ կստեղծվի թոշակառուների համար:

Դիտարկմանը, թե այդ դեպքում տարվա կեսից հնարավոր կլինի՞ բարձրացնել թոշակները, փոխնախարարը պատասխանեց՝ հնարավոր կլինի, եթե քննարկումների արդյունքում կգտնվեն լրացուցիչ գումարներ: