Ձեր վստահելի աղբյուրը

«Չեք անցկացնի» նախաձեռնությունում արդեն ծրագրել են Սահմանադրական բարեփոխումների հանրաքվեի քարոզարշավի շրջանակներում լինելու են Հայաստանի 25 քաղաքներում: Այդ մասին Panorama.am-ին տեղեկացրեց «Չեք անցկացնի» նախաձեռնության անդամ Դավիթ Հովհաննիսյանը:

«Մարզերում կլինեն դահլիճային և բացօթյա հանդիպումներ, իսկ Երևանում ֆլեշմոբեր ենք կազմակերպելու, ամբողջ Երևանում քարոզչական պաստառներ ենք փակցնելու, ֆիլմեր ենք նկարելու: Մի խոսքով, բուռն քարոզարշավ ենք անելու», -նախաձեռնության անելիքը ներկայացրեց Հովհաննիսյանը:

Նրա խոսքով, իրենք կօգտվեն նաև հեռուստատեսային եթերաժամանակից. «Կխնդրենք «Ոչ»-ին կողմնակից խորհրդարանական ֆրակցիաներին իրենց եթերաժամանակը տրամադրեն մեզ»:

Հարցին, թե ինչո՞ւ են այժմ սկսել «բուռն քարոզարշավ» իրականացնել, երբ այն մեկնարկել էր դեռևս հոկտեմբերի 10-ից, Հովհաննիսյանը պատասխանեց. «Այդ ընթացքում մենք հանրահավաք ենք կազմակերպել, էլի ակցիաներ արել ենք, այնպես չի, որ ոչ մի բան չենք արել»:

Քարոզարշավի ընթացքում «Չեք անցկացնի»-ն աշխատելու է միայնակ, բայց առանձին դեպքերում ներկա կլինեն «Ոչ»-ի մյուս ճակատների հավաքներին:

«Օրինակ ՀԱԿ-ը նոյեմբերի 20-ին կազմակերպում է հանրահավաք, բայց մենք դեռ պետք է քննարկենք, թե ինչ ձևաչափով մասնակցենք», -ասաց Հովհաննիսյանը:

Նոյեմբերի 4-ին «Նոր Հայաստանի» վանաձորյան հանրահավաքին, օրինակ, «Չեք անցկացնի» նախաձեռնությունից մարդ չի գնացել:

«Եթե չի գնացել, ուրեմն պատճառը տեխնիկական է եղել», - ասաց երիտասարդը:

Նա ասաց, որ ճիշտ է, իրենք հակասություն չունեն «ՈՉ»-ի ճակատի հետ, բայց որպես «առանձին անհատներ» առանձին գործողություններ են իրականացնում:

«Մենք գտնում ենք, որ լավագույն ձևը գնալ, քվեարկությանը մասնակցելն է, «ոչ» քվեարկելը, քվեարկությանը տեր կանգնելն է, եթե հանկարծ կեղծեն, ստիպել, որ այդ քվեարկությունը կեղծելու համար պատժվեն: Իսկ «Նոր Հայաստանը» գտնում է, որ դեկտեմբերի 1-ից պետք է անհնազանդության շարժում սկսել, եթե նրանց հաջողվի մինչև ամսի 6-ը իշխանափոխություն կատարել, որովհետև ռեսուսրների խնդիր կա էլի, այդ դեպքում հասարակությունն ակտիվացած կլինի, մի խոսքով մեր գործողությունները օգնում են միմյանց, որևէ խանգարելու կամ հակասությունների խնդիր չկա»,-հավելեց մեր զրուցակիցը:

Հարցին, թե որքանո՞վ կարող են իշխանափոխություն կատարել «Նոր Հայաստան» փրկության ճակատի անդամները, Հովհաննիսյանը պատասխանեց, որ եթե իրենք գտնեին, որ իշխանափոխություն կատարելու ռեսուրս ունեն, իրենք ավելի վաղ կհայտարարեին այդ մասին:

«Բայց եթե մենք այս պահին չենք հայտարարել այդ մասին, նշանակում է, որ մենք գտնում ենք, որ դեռ հերթը դրան չի հասել: Եթե իրենք հաշվարկել են, որ ունեն համապատասխան ռեսուրս իշխանափոխություն անելու համար, թող փորձեն», -ասաց «ՈՉ»-ի ճակատի ներկայացուցիչը:

Ինչ վերաբերում է հասարակության շրջանում հանրաքվեի վերաբերյալ տրամադրվածությանը, ապա Հովհաննիսյանն ասաց, որ իրենք խնդիր ունեն մարդկանց համոզել, որ գնան քվեարկության, քանի որ մարդկանց մոտ հիասթափությունը մեծ է և մտածում են, թե իրենց ձայնը ոչինչ չի որոշում:

«Մենք խնդիր ունենք համոզել մարդկանց ակտիվ լինել, գնալ քվեարկության, տեր կանգնել իրենց քվեին: Մենք «Ոչ» քարոզելու խնդիր չունենք»,-հստակեցրեց Դավիթ Հովհաննիսյանը:

Նա տեղեկացրեց, որ այս համապետական քվեարկության նկատմամբ հասարակական կազմակերպությունների հետաքրքրությունը մեծ է, և նրանք փորձում են այնպես անել, որ բոլոր ընտրատեղամասերում ունենան դիտորդներ, վստահված անձեր:

«Մենք հանդիպում ենք և կուսակցությունների, և ՀԿ-ների հետ փորձելով համադրել ուժերը: Այս ընտրություններում վերահսկողությունը իրոք, աննախադեպ է լինելու, որովհետև ՀԿ-ների կողմից ակտիվ ներգրավվածություն կա: Ես լիահույս եմ, որ չի լինի մի տեղամաս, առանց վերահսկողության», -հավելեց Դավիթ Հովհաննիսյանը: