Ձեր վստահելի աղբյուրը

Երիտասարդական պալատի, Սևան հյուրանոցի, Կայարանի հարևանությամբ, Ամիրյան փողոցում գտնվող կիսակառույց շենքերի ճակատագիրը քաղաքաշինության նախարար Նարեկ Սարգսյանի համար կարևոր հարց է:

«Մեզ այս ընթացքում հաջողվել է մի շարք ծրագրեր սկսել: Մասնավորապես, եկող տարի կսկսի Սևան հյուրանոցի շինարարությունը, հիմա պայմանագրերի վրա են աշխատում: Ամիրյան փողոցի կիսակառույցում արդեն սկսել են աշխատանքները: Երիտասարդական պալատում որևիցե նոր տեղեկատվություն չկա, բայց շատ շուտով մենք ԱԺ կներկայացնենք օրենք, որտեղ խիստ պատժամիջոցներ են նախատեսված այդ կարգի շինությունների համար»,-ասաց քաղաքաշինության նախարարը:

Գործադիր մարմնի ներկայացուցչի խոսքով, նման օրենքի ընդունումը միակ ճանապարհն է խնդիրը լուծելու համար. «Օրենքի նախագծով սահմանվում է, որ եթե երկու տարի շարունակ այդ կիսակառույցներում աշխատանքներ չեն իրականացվում, ապա խոշոր տուգանքներ են կիրառվելու»:

Ն. Սարգսյանի խոսքով, Երիտասարդական պալատի համար որևէ նախագիծ չկա, ոչ էլ շինարարական աշխատանքների վերջնաժամկետ է սահմանված. «Մեզ իրապես չի հաջողվել այդ խնդիրը լուծել: Ինչ-որ մի տեղ բավարարվածություն ունեմ, հիմա խոսում եմ որպես ճարտարապետ, որ ճապոնական նախագիծը, որը հաղթել էր մրցույթում, չի կառուցվել: Այդ առումով, ես անձնապես բավարարված եմ, որ այդպիսի օտար, Երևանի հետ կապ չունեցող շինություն չլինի: Նախագիծը չի բավարարում ոչ միայն ինձ, այլև իմ շատ գործընկերների»:

Հարցին, թե ինչու չի բավարարում, Ն. Սարգսյանը մանրամասնեց, որ դա մի անհասկանալի, խոշոր, ահռելի կառույց է՝ բնակելի. «Մրցույթ էր, ժյուրի կար, ժյուրիի իրավունքն էր ընտրել: Հիմա պատվիրատուն չի էլ պատրաստվում կառուցել, նա մեզ չի էլ դիմել, այն չի վերածվել կոնկրետ շինարարության»:

Նախարարից հետաքրքրվեցին, Կրկեսի նոր շենքի պատրաստ լինելու ժամկետների մասին. «Դա բավականին բարդ շինարարություն է: Այն այս պահին ընթանում է: Ամենաժամանակակից տեխնոլոգիաներով է իրականացվում: Իմ տվյալներով, դա պետք է ավարտվի 2016-ի վերջին կամ 2017-ի սկզբին»:

Տարածված այն լուրերը, թե կրկեսը քանդեցին նրա հետևում հյուրանոցը կառուցելու համար, Ն. Սարգսյանը հերքում է. «Բացարձակապես կապ չունի դրա հետ: Կրկեսը նախատեսված չէր քանդել: Այն կառուցվել էր շատ վաղուց, շենքն իր շինարարական որակով ավելի մեծ ծախսեր էր պահանջելու ուժեղացման համար, քան նորից կառուցելու դեպքում: Կոնստրուկցիաները բարակ էին ու մաշված»:

Կիսակառույցների թեմայի վերաբերյալ կարդացեք նաև՝

Ու՞ր է հասել քաղաքապետարանը կիսակառույցների հարցով. Նարեկ Սարգսյանը թվարկում է
Կիսակառույցների սեփականատերերը նոր պայմանագրեր պետք է կնքեն քաղաքապետարանի հետ, այլապես…
«Սևան»-ը` բացօթյա զուգարան, «Կուկուռուզնիկը»` բազալտի հանքավայր. Ովքե՞ր են Երևանն ապամոնտաժողները