Ձեր վստահելի աղբյուրը

«Սիրում ենք օտարել մեր գանձերը, հեռանալ մեր արժեքներից»,- լրագրողների հետ հանդիպման ժամանակ ասաց ՀՀ արվեստի վաստակավոր գործիչ Սերգեյ Առաքելյանը՝ խոսելով ազգային օպերետի, մասնավորապես «Ուշ լինի, նուշ լինի» օպերետի մասին:

Նշենք, որ Հ. Պարոնյանի անվան երաժշտական կոմեդիայի պետական թատրոնում սեպտեմբերի 11-ին կայացել էր Արտեմի Այվազյանի և Գարեգին Երիցյանի «Ուշ լինի, նուշ լինի» 2 գործողությամբ օպերետի պրեմիերան: Բեմադրությունը՝ Երվանդ Ղազանչյանի:

Նա նշեց, որ Տ. Չուխաջյանի «Կարինե» օպերետից հետո «Ուշ լինի, նուշ լինի» օպերետը համարվում է մեր օպերետային արվեստի բարձրակետը: Ս. Առաքելյանը հիշեց, որ հայտնի դերասան Կարպ Խաչվանքյանն այս օպերետը համարում էր «շեդեվր»:

Ս. Առաքելյանն ասաց, որ «Ուշ լինի, նուշ լինի» օպերետը բեմադրվել է յոթ անգամ, մի քանի անգամ վերաբեմադրվել:

«Բոլոր բեմադրություններին մի բան ավելացել է, երբեք չի կրկնվել»,- նշեց նա:

Խոսելով կոնկրետ վերջին բեմադրության մասին, Ս. Առաքելյանն ասաց, որ եթե Հրաչյա Ղափլանյանն ավելացրեց մի կերպար, Երվանդ Ղազանչյանն ավելացրեց երկրորդ կերպարը՝ հավաքական կերպար՝ ժողովուրդ: Ներկայացման մեջ 90 արտիստ է ներգրավված, համալրվել է երգչախումբը, հատուկ գործիքներ են ավելացել նվագախմբում՝ ջութակ, փողային, բալետային խումբը մեծացել է:

«Մեր խաղացանկի ամենափայլուն ներկայացումներից է»,- ասաց նա՝ առաձնացնելով երկու գլխավոր դերակատարներին՝ Շողիկին՝ Մարիամ Ղազարյան և Արշակին՝ Գևորգ Դավթյան:

Մարիամ Ղազարյանը բավականին դժվար է տվել իր համաձայնությունը խաղալ Շողիկի դերը: 

«Վախ կար մեջս, քանի որ շատ հայտնի դերասանուհիներ են խաղացել Շողիկի դերում»,- ասաց Մ. Ղազարյանը:

Պատասխանելով հարցին, թե որքան՞վ է արդիական օպերետում արծարծվող թեման, Ս. Առաքելյանն ասաց, նժարի վրա դրեք այն ժամանակն ու հիմա, որևէ տարբերություն չկա:

«Շատ ժամանակակից է»,- նշեց նա: