Ձեր վստահելի աղբյուրը

«Փոխելու նպատակը ո՞րն է»,- այսօր Քաջարանում «Այո և ոչ» հեռուստաշոուի ժամանակ Սահմանադրական փոփոխությունների հանրաքվեի քարոզարշավի շրջանակներում բնակիչներից մեկը հետաքրքրվեց «Այո» քարոզող խմբից, ինչին արձագանքեց ԱԺ աշխատակազմի ղեկավար Հրայր Թովմասյանը. «Փոխելու նպատակը շատ ավելի կայուն համակարգ ստեղծելն է, անկախ դատական իշխանություն ստեղծելն է, ստեղծելն է այնպիսի համակարգ, որ Սահմանադրությունից մինչև կյանք ճանապարհն անցնի ուղիղ, այնպիսի հնարավորություն տալ ընդդիմությանը, որ կարողանա ազդել քաղաքական որոշումների վրա»:

Մյուս քաջարանցին նկատեց, որ ինքը քիչ բան գիտի Սահմանադրությունից ու հետաքրքրվեց. «Այնքան վատն էր այս Սահամանդրությունը, որ մենք էս վատ վիճակին ենք հասե՞լ, ուզում եք լավացնեք: Ասենք մեր Սահմանադրությունը լավ լինի»:

Ի պատասխան Հրայր Թովմասյանն ասաց, որ աշխարհում չկա այնպիսի տեքստ, այնպիսի Սահմանադրություն, որը կլուծի խնդիրները ու հավելեց. «Սահմանադրության մեջ կան գործիքներ, մեխանիզմներ, կան ընթացակարգեր: Սահմանադրություն կիրառողը միևնույնն է մարդն է` ես, դուք: Մենք պարզապես ասում ենք այն մեխանիզմները, այն ինտսիտուտները, որոնք այս Նախագծում կան, շատ ավելի արդյունավետ են մեր երկրում գոյություն ունեցող խնդիրների լուծման համար»:

«Ժողովրդին պետք է ժողովրդի լեզվով բացատրել և ոչ թե տերմինակոխ անել», -երկխոսությանը միջամտեց «Ոչ»-ը քարոզող խմբի անդամ անկուսակցական Թամարա Գևորգյանը ու նկատեց, որ նախորդ Սահամանդրությունների ժամանակ էլ բոլորը պնդում էին, որ ամեն ինչ ավելի ժողովրդավար ու լավ է լինելու:

«Ինչու չհաջողեցիք, կարող է խնդիրն այն էր, որ կային ապաշնորհ կառավարողներ, կարող է բոլորը օրենքի առաջ հավասար չէին և այլն», -հարցադրումներ արեց Գևորգյանը:

Նա «Այո»-ի կողմնակիցներին հորդորեց ցույց տալ այն կուսակցություններին, որոնք խորհրդարանական համակարգին անցնելու դեպքում կարող են ցույց տալ իրենց «քաղաքական հասունությունը». «Դիմում եմ այստեղ հավաքված կանանց. եթե ձեր ամուսինն ասի` սիրելիս միկադո շատ եմ սիրում ու Ձեզ չտա խտացրած կաթ, կարագ, ալյուր և այլն, այդ տորթը կստացվի՞»:

Այնուհետև դիմելով հավաքվածներին Գևորգյանը հետաքրքրեվեց` Ո՞վ է հավատում, որ այս սահմանադրությունը ընդունվելու դեպքում ամեն ինչ լավ է լինելու, թող ձեռ բարձրացնի և երբ ոչ մեկ չբարձրացրեց, տիկին Գևորգյանը եզրափակեց. «Վերջ, շնորհակալություն»:

Ի՞նչ է փոխվելու և արդյոք Սահմանադրության ընդունմամբ լավանալո՞ւ է մարդկանց կյանքը հարցին պատասխանեց «Այո»-ի խմբի անդամ Արման Սաղաթելյանը և ասաց, որ Նախագիծն առաջարկում է վերացնել բոլոր սուբյեկտիվ գործոնները, որոնք չեն թողնում հասարակությանը զարգանալ:

«Ասում են` չունենք քաղաքական զարգացած համակարգ, համաձայն եմ, չունենք: Եթե ընտրություններում դու չես ստանում բավարար քանակի ձայն, քեզ մնում է սերմանել ատելություն, անհանդուրժողականություն, սպասել հինգ տարի, գալ լոտորեյի նման կրկին ջնջել ու փորձել գալ իշխանության, չհաջողել ու շարունակել նույն ոճով: Բայց արանքում կորցնել և համախոհներին, և ամեն ինչ: Նախագծով ամրագրված համակարգն առաջարկում է բացարձակ մեծամասնությամբ որոշել կարևոր հարցեր` ով կլինի դատախազ, ԿԸՀ նախագահ, Կենտրոնական բանկի համակարգ, որպեսզի ընդդիմությունը պարապ անգործ չմնա, կարողանա մասնակից լինել հարցերի լուծմանը», -բացատրում էր Սաղաթելյանը: Այս պարագայում, նրա խոսքով, մնում է, որ ընդդիմությունն ու իշխանությունը կկարողանան երկխոսել, փոխզիջման գալ, ինչպես արվում է քաղաքակիրթ երկրներում:

«Այսօր շրջանառության մեջ դրված Սահմանադրության ընդունելու պարագայում, պարզ է, գարնանը բերք չենք քաղելու: Շիթիլը հիմա ենք տնկում, որ հետո բերքը տեսնենք, ես հույս ունեմ տեսնել բերքը, որովհետև չեմ ուզում ապրել մի երկրում, որի ինստիտուտները, համակարգերը կայացած չեն», -հայտարարեց Սաղաթելյանը` քաջարանցիներին հորդորելով որոշումը կայացնել կարդալուց, ուսումնասիրելուց վերլուծելուց հետո:

Երբ «Ոչ»-ը քարոզող խմբի անդամ քաղաքական գործիչ Ազատ Արշակյանը հայտարարեց, որ Սաղաթելյանը խոսում է իշխանության անունից, վերջինը արձագանքեց. «Ոչ: Ես խոսում եմ մարդկանց անունից, որոնք պրոգրես են ուզում էս երկրում»: