Ձեր վստահելի աղբյուրը

«Տեղեկատվական տեխնոլոգիաների ոլորտում Նոբելյան մրցանակ չկա, ինքս Տեղեկատվական տեխնոլոգիաների ոլորտում համաշխարհային ներդրման համար Հայաստանի նախագահի  մրցանակը ստանում եմ որպես այդպիսին»,-2015 թվականի նույն մրցանակին արժանացած  «Կասպերսկի լաբորատորիա»-ի գործադիր տնօրեն Եվգենի Կասպերսկուն ներկայացնելիս ՀՀ նախագահի մրցանակաբաշխության գործադիր խորհրդի նախագահ Հովիկ Մուսայելյանը հիշեց «Apple Computer» կորպորացիայի հիմնադիր դոկտոր Ստիվ Վոզնիակի խոսքերը, ով այդ մրցաակին արժանացել է 2011-ին:

Լրագրողների հետ հանդիպման ժամանակ նա ասաց, որ վաղը նախագահական նստավայարում նախագահ Սերժ Սարգսյանը մրցանակը հանձնելու է Եվգենի Կասպերսկուն:

Ե.Կասպերսկին նշեց. «Անչափ շնորհակալ եմ Հայաստանի նախագահի հեղինակավոր մրցանակի համար և ինձ համար մեծ պատիվ է համալրել նախորդ տարիների մրցանակակիր տեխնոլոգիաների հսկաների շարքը»:

Ե.Կասպերսկու խոսքով, հաճելի է տեսնել, որ ՏՏ ոլորտը զգալի աջակցություն է ստանում պետական մակարդակով՝ որպես երկրի սոցիալական և տնտեսական առաջընթացի գերակա ուղղություններից մեկը:

Տեղեկատվական տեխնոլոգիաների ոլորտում համաշխարհային ներդրման համար Հայաստանի նախագահի մրցանակը ստեղծվել է վեց տարի առաջ:

«Այս տարիների ընթացքում լեգենդար հաղթողներ ենք ունեցել: Աշխարհում մրցանակն այնպիսի ճանաչողություն է ստացել, որ լեգենդար շատ անձնավորությունների համար ուղղակի պատիվ է ստանալ այս մրցանակը: Այն մրցանակակիրները, ովքեր արդեն եղել են Հայաստանում, նաև այս տարվա մրցանակակիրը, ապագայում սիլիկոնյան հովտի այլ հայտնիներ, տարբեր երկրների լեգենդար անձնավորություններ, ովքեր մարդկության պատմության ընթացքը փոխել են, կգան Հայաստան՝ այդպես բարձրացնելով նաև Հայաստանի ճանաչողությունը»,- ասաց Հ. Մուսալեյանը:

Նրա խոսքով, տարիներ անց այս պատվավոր մրցանակին արժանացած հսկաները կժամանեն Հայաստան՝ իրենց հետ բերելով բարձրագույն տեխնոլոգիական ժամանակակից մշակույթ, և ամբողջ աշխարհում կբարձրացնեն Հայաստանի իմիջը, որպես գիտելիքին և ինտելեկտին ապավինող երկիր:

«Անհերքելի է, որ Հայաստանի մրցակցային առավելությունները սերտորեն կապված են ՏՏ ոլորտի հետ և մեր երկիրն ունի բոլոր անհրաժեշտ նախադրյալներն ու ռեսուրսները դառնալու տարածաշրջանային կենտրոն և կարևոր դերակատար»,- ասաց Հ.Մուսայելյանը:

Մրցանակաբաշխության հովանավոր «ՎիվաՍել-ՄՏՍ» ընկերության գլխավոր տնօրեն Ռալֆ Յիրիկյանն ասաց, որ իբրև կորպորատիվ պատասխանատու ընկերություն, սատարում, հովանավորում են այսպիսի ծրագրեր. «Մենք պարտավոր ենք աջակցել ազգային կարևորության այսօրինակ ծրագրերի իրականացմանը՝ խրախուսելու ոլորտի հետագա առաջընթացը: Հավատում ենք, որ Հայաստանում բավականին ներուժ կա տեղեկատվական տեխնոլոգիաների ոլորտում: Կարողանում ենք այս ծրագրի շրջանակում բարձրացնել մեր երկրի անունը: Այս մրցանակը ճանաչում է տալիս ոչ թե աշխարհի հանճարներին, այլ միջազգային ճանաչում է տալիս մեր տեղեկատվական տեխնոլոգիաների ոլորտին ու ավելի տեսանելի է դարձնում մեր ներուժը»:

Նշենք, որ ընկերությունն այս վեց տարիների ընթացքում ծրագրի իրականացման նպատակով տրամադրել է 125 միլիոն դրամ:

Եվգենի Կասպերսկու այցը Հայաստան եռօրյա է: Լրագրողների հետ հանդիպմանը հաջորդեց Կասպերսկու՝ «Վտանգների ինտերնետը» խորագրով դասախոսությունը՝ տեղեկատվության և հաղորդակցության տեխոլոգիաների համայնքի ներկայացուցիչների համար: Այսօր նա կայցելի նաև «Թումո» կենտրոն, վաղը կլինի Ճարտարագիտական համալսարանում, նախագահական նստավայրում, նոյեմբերի 18-ին կայցելի Հայոց ցեղասպանության թանգարան-ինստիտուտ, կհանդիպի ՀՀ վարչապետի հետ:

Հիշեցնենք, որ 2009 թ. հուլիսի 6-ին Հայաստանի նախագահ Սերժ Սարգսյանը ստորագրել է տեղեկատվական տեխնոլոգիաների ոլորտում համաշխարհային ներդրման համար ՀՀ նախագահի մրցանակի (Համաշխարհային ՏՏ մրցանակ) հիմնադրման վերաբերյալ հրամանագիրը: Մրցանակը յուրաքանչյուր տարի շնորհվում է համաշխարհային ՏՏ ոլորտում բացառիկ ներդրումներ կատարած հեղինակավոր անհատի, ում ներդրումները ՏՏ ոլորտում բերել կամ բերում են հեղափոխական կամ համանուն բնույթ ունեցող զարգացումների, որոնք դրականորեն են անդրադարձել կամ ունեն ներուժ դրականորեն անդրադառնալու պատմության ընթացքի վրա: Այդ ներդրումները կարող են ունենալ տարբեր դրսևորումներ՝ տեխնոլոգիական, կրթական, ձեռնարկատիրական, ֆինանսական:

Համաշխարհային ՏՏ մրցանակի առաջին դափնեկիրն է եղել «Ինտել» կորպորացիայի նախկին գլխավոր գործադիր տնօրեն, տնօրենների խորհրդի նախագահ դոկտոր Քրեյգ Բարրետը, երկրորդ դափնեկիրը՝ «Apple Computer» կորպորացիայի հիմնադիր դոկտոր Ստիվ Վոզնիակը, երրորդ դափնեկիրը՝ «Synaptics» ընկերության պատվավոր նախագահ, «Ֆեդերիկո և Էլվիա Ֆաջին» հիմնադրամի նախագահ դոկտոր Ֆեդերիկո Ֆաջինը, չորրորդ դափնեկիրը՝ Կիսահաղորդչային արդյունաբերության մասնագետների միության նախագահ, «Հիտաչի» ընկերության նախկին գործադիր տնօրեն դոկտոր Ցուգիո Մակիմոտոն: Նախորդ տարի մրցանակը տրվել է «Cisco» ընկերության զարգացման գծով նախագահ Մարիո Մացոլային:

Նշենք, որ մրցանակը դրամային չէ: Մրցանակը բաղկացած է Հայաստանը և բարձր տեխնոլոգիաները խորհրդանշող ոսկե մեդալից, դիպլոմից, հուշախորհրդանիշից: Մրցանակաբաշխության ծրագիրն իրականացվում է ՀՀ նախագահի կողմից նշանակված մրցանակաբաշխության կոմիտեի և միջազգային ընտրող հանձնաժողովի կողմից: