Ձեր վստահելի աղբյուրը

Այսօր Տաթևում փոքրիկ Անուշիկի կողմից մեկ բաժակ թանով հյուրասիրվելուց հետո ԱԺ պատգամավոր Կարինե Աճեմյանը նկատեց, որ Տաթևում մթնոլորտը չի տրամադրում քաղաքական երկխոսության, այդուհանդերձ սկսեց քարոզել «այո»-ն:

Նա տաթևցիներին տեղեկացրեց, որ Սահմանադրական փոփոխություններով «մեծ հարց է լուծվում»: Նաև ասաց, որ իր համար հասկանալի է` ամեն փոփոխություն անհանգստություններ կարող է առաջացնել: Հանրապետական պատգամավորը համաձայնեց ընդդիմախոսների այն պնդմանը, թե Հայաստանում ընտրությունները կրճատվում են և փոխարենը միայն առաջնային մանդատով խորհրդարան է ընտրվելու:

«Երբ դու առաջնային մանդատով Ազգային ժողով ես ընտրում և քո ձայնը տալիս ես կուսակցության, պատգամավորների, դու հստակ որոշում ես ու հետագայում կարող ես պահանջատեր լինել: Նախ նման համակարգը ձևավորում է նոր քաղաքական մշակույթ, որը մենք չունենք, խոշորացնում է կուսակցությունները և շատ ուժեղացնում է ընդդիմությանը, որը մեզ շատ պետք է, որովհետև երբ ընդդիմությունն ուժեղ է, զգոն է լինում իշխանությունը», -հայտարարեց Աճեմյանը` նկատելով, որ ընտրություններից խուսափելը նաև բյուջետային գումարներ է տնտեսում:

Նա խնդրեց հեռավոր գյուղի բնակիչներին նայել շուրջը և տեսնել` մի՞թե դրական փոփոխություններ չեն կատարվում: Ըստ պատգամավորի, Սահմանադրությունը օրվա հարցեր չի լուծելու, այլ «երկրի զարգացման համար բարենպաստ պայմաններ է ստեղծում»:

«Անպայման մասնակցեք քվեարկությանը, քանի որ սա մայր օրենք է, որի նկատմամբ պետք չէ անտարբեր անցնել», -հավելեց Աճեմյանը:

«Սահմանադրություն կա, կատարողն ո՞վ ա, անկատար ա մեր Սահամանդրությունը, ոչ մեկ չի կատարում: Հինը հլա կատարի, հետո նորի մասին կմտածես», -Աճեմյանի ելույթին արձագանքեց գյուղի տարեց բնակիչներից մեկը: