Ձեր վստահելի աղբյուրը

«Սահմանադրական փոփոխությունների նախագծի մարդու իրավունքներին վերաբերող հատվածը շատ ավելի հստակեցրել ենք և նույնիսկ չլինելով Եվրոպական Միության անդամ, մենք վերցրել ենք ավելի խորը չափորոշիչներ, որի պարտավորությունը չունեինք միջազգային առումով», -այսօր Սյունիքի մարզի Տաթև համայնքում հանարքվեի քարոզարշավի շրջանակներում և «Այո և ոչ» հեռուստաշոուի ժամանակ բնակիչների հետ հանդիպմանը հայտարարեց ԱԺ աշխատակազմի ղեկավար Հրայր Թովմասյանը, որն «Այո»-ն քարոզողների խմբից է:

Նա վստահ է, որ իրավունքների և ազատությունների մասով Հայաստանի Սահմանադրությունը կարող է մրցել եվրոպական ցանկացած Սահմանադրության հետ: Միաժամանակ, ըստ նրա, նախագծի մշակողները հավատարիմ են մնացել հայկական արժեհամակարգին:

Անդրադառնալով Սահմանադրության նախագծով առաջարկվող կառավարման ձևի փոփոխությանը, Թովմասյանն ասաց, որ գործող կիսանախագահական կառավարման ձևը «չի երաշխավորում պետության կայունությունը, հեռանկարային զարգացումը»:

«Գործող համակարգը տևական ու հեռանկարային համակարգի զարգացման համար երաշխիքներ չի ստեղծում», -հայտարարեց Թովմասյանը` տաթևցիներին տեղեկացնելով, որ նման համակարգեր են գործում Թունիսում, Եգիպտոսում, Պակիստանում, Աֆղանստանում, Ադրբեջանում և այլն:

Առաջարկվող փոփոխությունների նպատակը, ըստ Թովմասյանի, կանխատեսելի զարգացում ունենալն է, որ ընտրությունների արդյունքում չլինեն հանրային բախումներ, չլինի հասարակության բևեռացում, լինի հանրության հսկողության տակ գտնվող իշխանություն:

«Այնպես չէ, որ այս Սահամանդրությունն ընդունեցինք մեր երկրում, գյուղում առկա բոլոր խնդիրները միանգամից լուծվելու են: Մի պատմություն կա. մի իմաստուն է լինում, որն ամեն ինչ գուշակում է:
Աշակերտները որոշում են բռնացնել ուսուցչին, որ ասեն՝ տես, այս մի բանը չգիտես։ Ձեռքի մեջ թիթեռ բռնած՝ մոտենում են, և հարցնում, թե ի՞նչ է ձեռքի մեջ։ Աշակերտները մտածում են՝ եթե ասի՝ կյանք է, կսեղմեն թիթեռին, ցույց կտան, որ մահացած է։ Եթե ասի՝ մահ է, բաց կթողնեն, թիթեռը կթռչի։ Այս մարդը գլխի է ընկնում՝ ինչի մասին է խոսքը։ Նա ասում է՝ և մահն է ձեր ձեռքում, և կյանքն է ձեր ձեռքում, և ընդհանրապես՝ ամեն ինչ էլ ձեր ձեռքում է։ Իրականում ավելի լավ, ավելի հզոր Հայաստան ունենալու հարցում ամեն ինչն էլ մեր ձեռքում է, ոչ ոք չի գալու մեր փոխարեն ավելի լավ հայրենիք կառուցելու: Պարզապես պետք է արձանագրենք, որ այս նախագիծը, այս փոփոխությունները, վստահ եմ, մեզ շատ ավելի լայն հնարավորություններ են տալիս», -հայտարարեց Թովմասյանը: